تااابع الرواية

(اليوم الثاني)
ام صالح اللي هي منيرة متحمسة جدآ وقالبة البيت فوق تحت من اول ماقامت الظهر...
سلطان: أقول حشى ميب خالتك اللي جاية كونداليزا رايس من يوم ماقمتي وانتي مشقية عمرك وتتأمرين يارهف حطي يارهف شيلي..
منيرة:بسم الله على خالتي من ذيك الشرية
سلطان: أقول منيرة انتي وشعندك؟؟
منيرة: وش اللي وشعندي مافهمتك؟؟
سلطان:منيرة بلا لف ودوران انتي في حياتك ماسرتي سنعه كل ذا السنع وكريمة ياكثر الحريم اللي يجونك ماقد سويتيلهم ربع اللي قاعدة تسوينه ولا تقولين لي من ريحة أمي ماقد جبتي خبر امك أصلآ عشان تجيبين خبر خالتها..
ابتسمت منيرة وقعدت جنب سلطان:
والله يا سلطان مايفهمني الا انت اجل بقولك وش اللي بخاطري
سلطان: قولي انا اعرف ماتسوين شي لله
منيرة:شوف يا سلطان خالتي هذي عندها خمس عيال تزوجوا اثنين وبقوا ثلاث عزاب وكلهم يا بوصالح مناصب ولا واحد منهم راتبه أقل من العشرة آلاف الا الصغير اللي بالجامعة توه بزر يدرس
سلطان: طيب انا الآن موب فاهم انتي وشاللي محمسك لهالدرجة
منيرة:يابوصالح انت ماتدري ان بيتك مليان بنات؟؟
سلطان:آآآآه يعني انتي تبين هالثلاثة ياخذون بناتي رهف وابرار واثير
منيرة بكل عصبية: لا وماودك تعطيهم أفنان مجانآ ويدخلون السحب على سيارة جيب؟؟؟
سلطان:وشفيك عصبتي يامرة وشقلت أنا؟؟
منيرة:شوف يا سلطان ان تم اللي براسي وتقدم واحدن منهم لبناتي ماياخذ الا ابرار أو أثير وبنتك رهف ماعليه بيجيها نصيبها وانا مابتعب كل هالتعب الا عشان اقرب خالتي مني واستفيد منها وافيد بناتي وبنتك ماشالله مستغنية مدرسة ماتحتاج واحد من عيال خالتي يصرف عليها ولا تنسى لا زوجت بنتك رهف أول من بيخسر انت خلها عندك ازينلك..
سلطان:.....
منيرة: ياللاه انا بروح اكمل باقي الشغل
***وتطلع منيرة عند غرفة بناتها وتدق الباب: أثير أبرار أفتحوا
وتفتح أثير الباب وأبرار كانت ممدة عالسرير تحوس فجوالها
منيرة: مابعد زينتي اللي قلتلك انتي وياها؟؟
ابرار: يووووه يمه شنزين؟؟
منيرة:تروشوا أكووا ثيابكم اللي بتلبسونها ترتبوا زينوا شعوركم
ابرار: يمه احنا جمعات العجايز ما نحبها
منيرة: أقول هذي اللي جايه مو أي وحدة ياغبية انتي وهي هذي انشالله اذا جت وشافتكم بتنفتح لك انتي واختك ابواب الرزق
اثير: مافهمت يمه
منيرة: المهم تزينوا عشان لاشافتكم تخطبكم
ابرار:صدق يمه عندها عيال شباب
منيرة:ايه وانا امك لااوصيكم في التزين والتسنع ابيكم تبيضون الوجه طيب
ابرار بغت تموت من الفرحة وعلى طول انقزت لدولاب الملابس تطلعلها لبس وأثير راحت تاخذ روب الحمام والمنشفة عشان تتروش واللي يشوفهم يقول انه هالمرة اللي جاية صدق جاية تخطبهم مو بس جاية زيارة بريئة..
-----------------------------------------------------------------------------
--------------------------------------
خلود: ياخوي سم بالرحمن ودق لاتخاف
وليد:اخاف اني ادق بوقت مو بزين
خلود: يا وليد الحين وقت الظهر وفيوم خميس يعني لادوامات ولا هو وقت صلاة وكل الناس بهالوقت فاظين وقاعدين وبالذات ابو رهف تلاقيه قاعد يطالع ذا الأسهم أخضر واحمر دق بس وانشالله مايسير الا كل خير
وليد: أقولك خليها بكرة بعد صلاة الجمعة أدق عليه يمكن الحين بيجيه ناس أو مشغول او شي
خلود:ياوليد تراك تعتبني وأنا ترى مابت عندكم من أمس وتاركه رجلي لحاله بالبيت إلا عشان أكون جنبك في اللحظة اللي أنت تكلم فيها أبو رهف وأشوف وشيسير بعيني ياللاه ياوليد توكل على الله ودق ولا تنسى ترى ولده الكبير اسمه صالح ناده ابوصالح
وليد: توكلت على الله ياللاه هذا تلفونه يرن
**ابوصالح: سم
وليد: السلام عليكم
ابوصالح: وعليكم السلام
وليد: العم أبو صالح
ابوصالح: إي نعم سم
وليد: معاك وليد ابن سالم
ابوصالح:ياهلا بك سم يا ولدي
وليد: بصراحة ياعم صالح بغيتك بموضوع خاص وابي اجيك الما بيتك واقابلك إذا تسمحلي
أبوصالح: تجي بيتي ؟؟ وفموضوع خاص؟؟ بس أنا ابي أعرف وشهالموضوع الخاص قبل ماتجي وادخلك بيتي؟؟
**وليد هنا تلعثم وخاف وحس بنبرة صوت سلطان تغيرت من بعد ما كان يتكلم بكل احترام انقلبت لهجته للهجة تحقيق
وليد: بصراحة ياعم انا سمعت عنكم وعن طيب أخلاقكم من طرف حريم يقربونلي يعرفون عايلتك وأنا ودي أجي يمك وأطلب أيد بنتك الكبيرة
أبوصالح:.......
وليد: معي ياعم ابو صالح؟؟
ابوصالح:يسير خير انشالله كلمني بعد صلاة الجمعة بكرة وأنا أوصفلك البيت ومتى ما جيت حياك الله
وليد: وهو مصدق نفسه انشالله ياعم أبوصالح بعد صلاة العصر أكون عندكم
ابوصالح: على خيرة الله
...
.......
وقفل وليد السماعة وهو مومصدق إن أول خطوة تمت بسلام وانشالله إن باقي السالفة كلها تعدي على خير ويسير هو رهف تحت سقف واحد...
خلود:وليـــــد تكلم وشقالك؟؟
وليد:يقول دق علي بعد صلاة الجمعة ومتى ماجيت حياك الله
خلود: احلف يا وليد
وليد: وليه أكذب عليك يا خلود هذا الكلام اللي قاله لي
خلود: أجل خلني أدق على ر هف وأقولها أن أبوك رحب بوليد وقاله انه يجي
وليد: طب انتي وين قايمة
خلود: استح على وجهك تبيني اكلم البنت قدامك بروح اكلمها من غرفة خواتي وانت ياعريس قول لأمي وابوي عشان أبوي يروح معك بكرة
..
....
دقت خلودعلى رهف مرة ومرتين وثلاث لكن رهف كانت حاطة جوالها فوق بغرفتها وهي بالحوش قاعدة تغسله بالهوز وتمسحه لحالها لأن أمها السيدة منيرة قالتلها أنا بأكمل عنك شغل المطبخ وانتي روحي غسلي الحوش كله تراب.. **
*&*
مرت الساعات وكل شي جاهز وأم صالح طلعت من العوده الغالية اللي مخبيتها للمناسبات المهمة وقعدت تلف بالبيت تدخنه.. بعد ماتأكدت إن كل شي جاهز
طلعت عند بناتها فوق ..
منيرة: ها تجهزتوا لبستوا زين؟؟
أثير: أي يمه أنا خلصت
منيرة: وابرار وينهي؟؟
اثير: بالحمام تستشور شعرها
منيرة: هالبنت ماتفهم كم مرة أقولها إذا بغيتي تستشورين شعرك سشوريه بغرفتكم بس ماتفهم
أثير: يمه أبرار تقول أن ارض الغرفة بعدين بتمتلي شعر وهي ماتبي تكنس فتقول بالحمام أصرف
... أبرار طلعت من الحمام وهي وجهها أحمر من المعارك الطاحنة مع كشتها:
ها يمه وشفيك تزاعقين
منيرة : مابعد خلصتي؟؟
ابرار: لا بس بقى الميك أب وخلاص
منيرة وهي تصك باب الغرفة: اسمعي انتي وهي لا تقعدونلي سندريلات كل وحدة حاطة رجل على رجل واختكم قايمتن قاعدة يعننها أم السناعة وانتوا قاعدات اقعدوا باشروا عالحريم وصبوا القهوة والشاهي وضيفوا الحلا ولا تقعدون كل شوي تطالعون بجوالاتكم ولاتداحرون بعض يا ويلكم ابيكم مؤدبات وسنعات إذا جوا لاتخلون رهف تدخل المطبخ أبد انتوا ضيفوا كل شي فهمتوا؟؟
اثير:لاتوصين حريص
ابرار: ياسلام يعني نكرف وهي الاخت مرتزة هاه؟؟
منيرة: شوفي يا ابرار هالبنية من امس وهي تحوس بالبيت وانتي مازينتي شي يعني لاقمتي وقعدتي ساعتين بس قدام هالحريم وبيضتي وجهي مابيضرك شي؟؟
ابرار: اووووف طيب
...
.....
رجعت منيرة ودخلت على رهف وهي قاعدة تكوي ثوب صالح...
منيرة: من ذا ثوبه؟؟
رهف: ثوب صالح يقول انه بيطلع بعد شوي
منيرة: طب هو تغدى؟؟
رهف: هنا جوى بالبيت ماتغدى بس يمكنه تغدى برا
منيرة: طب إذا خلصتي البسي بسرعه وتعالي اقعدي معنا لاجوا الحريم
رهف وهي مرهقة:انشالله
**راحت منيرة لغرفة الجلوس ولقت صالح متمدد وسرحان كعادته..
منيرة: صالح حبيبي وينك ماشفناك عالغدى؟؟
صالح يقوم ويحب راسه أمه وايدها:
هلا يمه كنت معزوم عالغدى عند صديقي
منيرة: يا هالاصدقا ياولدي اللي خذوك مني من يوم مادخلت هالجامعة
صالح: لا تخافين على ولدك يمه كلنا شباب وجلسات عزاب مافيها شي أروح أغير جو وأذاكر..
**رهف وهي شايلة ثوب صالح: خلاص صالح كويته
ياخذ صالح الثوب من ايدها بدون أي كلمة شكر
ويلبسه من تحت ورهف ماسكه له ياقة الثوب من فوق وتناظر فيه بكل محبة وحنان طول ماهو يلبس
صالح:ياللاه أستأذن
منيرة: وين بعد بتروح توك جاي؟؟
صالح: الحين انتم مابيجيكم حريم وشقعد أزين هنا ابطلع
منيرة:طب اقعد مع ابوك بالملحق ؟؟
صالح: ابوي أي يبلغ لاخلاص أنا طالع
منيرة:طيب مر عليه ترى له يومين ماشافك؟؟
صالح وهو طالع وعيونه بالارض ويحك راسه بيده معصب شوي: مايحتاج
قعدت رهف سرحانة وتطالع بخوها الين طلع من باب الحوش وتقول بنفسها:
يارب احميه,,, ياترى اشفيك يا صالح دايم حزين ومعصب ومالك شهية للأكل ولا لك خلق تسوي أي شي بالحياة آه يا صالح ياليتك ترجع زي ماكنت بالمتوسطة حبيب وطيب وتسولف معي وتقعد معي وتمزح وتفرح وتنبسط الحين ابتسامتك مانشوفها..
منيرة:وانتي للحي قاعدة ماودك تقومين تلبسين؟؟
رهف:هاه....انشالله هذا أنا قايمة
**
وطلعت رهف لغرفتها وخذت منشفتها ودخلت تتروش بس عصبت من المنظر اللي شافته...
رهف: زي كل مرة يا ست أبرار ماتبطلين حركاتك..
كان الحمام حالته حاله كل المغسلة مليانة شعر من كشة أبرار وسشوارها محطوط على طرف المغسلة وشباصات الدنيا موزعة على البانيو ومراية المغسلة واطراف المغسلة..
رهف: حشى موب سشوار شعر حرب قامت في هذا الحمام..
خلصت رهف ترويش ودخلت غرفتها طلعتلها تنورة بني وبلوز تركواز ناعمة ونشفت شعرها بسشوار خفيف ولمت اطرافه بشباصة بنيه ولبست حلقان فيها خرز فيروزي وكحلت عيونها وحطت جلوس زهري
بعد ماخلصت رهف طلعت من غرفتها ودقت باب غرفة خواتها ودخلت....
لما دخلت رهف ما استوعبت الشي اللي قدامها ماكان من رهف الا انها تقول في نفسها (توووووووو متــــــش)
رهف: اشهذا انتوا وين رايحين عرس اشهالفل ميك اب؟؟
ابرار: لا تبين اشكالنا كنا رايحين عزى وبعدين لو سمحتي أنا كم مرة قلتلك ذوقنا يختلف عن ذوقك فعشان كذا ريحي نفسك وخلي نصايحك لك..
وطلعت ابرار من الغرفة ودفت رهف اللي كانت واقفة عند الباب...
بعدين تذكرت انها ما قالت اهم شي..
ابرار: أي والاهم من هذا كله انه عمرنا مو بعمرك عشان تبين الناس يسيرون زيك...
رمت ابرار هالكلام القاسي على رهف ونزلت تحت....
رهف وهي مو قفة سرحانة عند الباب..
أثير: رهف بغيتي شي؟؟
رهف: أي صح بس بغيت اسأل عطري آنسلنس اللي بشنطة المدرسة وينه؟؟
اثير: أي صح ارسلنا افنان تاخذه من شنطتك عشان نتعطر فيه ونسينا نرجعه معليش
خلاص تقدرين تاخذينه هذا هو عالكومدينة يارهف
**رهف خذت العطر وطالعه من باب الغرفة..
أثير: رهف استني شوي..
وتطير أثير لباب الغرف وتصكه وتمسك رهف وتجلسها عالسرير ورهف طايرة عيونها..
أثير: رهف صدق شكلي غلط؟؟
رهف وهي مبتسمة: لا بسم الله عليك تهبلين يا أثير..
أثير: طب وش اللي موب زين بشكلي؟؟
رهف: بالعكس كل مافيك حلو بس انتي لو تخففين من الظل الفاقع الثقيل هذا وتبقين بس على الكحل والمسكرة أنعم تدرين ليه لأنه هالزيارة زيارة عصر مو بسهرة وبعدين يا اثير انتي لسه عمرك 17يعني هالمكياج كله بيكبر سنك ويشوهك..
أثير: طب يعني قصدك اخفف من هالظل وبس ؟؟
رهف: ايوا وياليت كمان بدل هالاثقال اللي بأذانيك تحطين حلقان خفيفة وناعمة مرة رح يكون شكلك كيوت..
أثير بعد ما اقتنعت بكلام رهف: طيب خلاص اطلعي وصكي الباب وراك
رهف ضحكت على هالطردة المحترمة وخذت عطرها وطلعت برا الغرفة...
ودخلت غرفتها وتعطرت ورجعت العطر مكانه بالشنطة وانتبهت انها من زمان ما مسكت جوالها خذت جوالها ولقت فيه ثلاث مكالمات لم يرد عليها من خلود..ومسج
كاتبة فيه (رهف بسرعة دقي علي ابيك ضروري)
خافت رهف وعورها قلبها قالت الله يستر لايكون ابوي كلمه وليد وهزأه وبسرعه دقت على خلود بس تذكرت انها ماعندها رصيد فارسلت لها كول مي
وثواني ولاخلود تدق على رهف:
خلود:إنا لله انتي وهالسوا
رهف: خلود اشفيه خوفتيني
خلود: مافيه الا كل خير وشفيك انتي خايفة؟؟
رهف:طب اشفيه تكلمي
خلود: أول شي الناس اذا يبون احد مايعطونه كول مي ثاني شي الناس يقولون السلام عليكم وعليكم السلام كيفكم شخباركم ماهو ها وشفيه كني اصغر عيالك
رهف: تكفين ياخلود لايكون ابوي هزا وليد ولا قالكم شي
خلود: يا بنت الحلال مخوفتنا من ابوك عالفاضي ابوك ما قال شي
رهف:يعني اشلون ماقال شي
خلود: يعني قال حياك الله ياوليد عندي بكرة وهذي كل السالفة
رهف:خلود انتي تمزحين
خلود: والله يا رهف ما امزح وانشالله باذن الله وليد عندكم وانتي الصيفية الجاية عندنا..
رهف سرحت ومشاعر الدنيا كلها قامت تحوس بقلبها ماتدري فرح ولا حزن ولا خوف ولا احساس بالاستقرار...
خلود: اقول لوانه انتي اللي داقة ما قعدتي معي كل هالوقت ياللاه تبين شي
رهف وهي مبتسمة : لا سلامتك
خلود: تدرين لما يتزوجك وليد أول شي انطلعك بطاقة جوال بالفواتير بدل هالسوا والازعاج
رهف تضحك وفي حالة ذهول للآن مو مستوعبة اللي قالته لها خلود..
خلود: شكلك متنحة انا اعرف ضحكتك لا تنحتي؟؟
رهف: خلود انا خايفة
خلود:لا تخافين يارهف دام وليد جايك بكرة وانشالله مو بطالع من عندكم الا وهو محدد الملكة والزواج بعد..
رهف: الله يقدم اللي فيه خير
خلود: ياللاه رهف اخليك الحين انا في السيارة مع زوجي وراجعة بيتي مع السلامة
رهف :..... مع السلامة
....
.....
ماجد: هذي رهف اللي بيخطبها وليد
خلود وهي تتنهد: أي هذي هي ياماجد
ماجد: الحين وراها ذي مستعجلة عالعرس انا اعرف البنات ماتدري من اللي خطبها الا لما يجونها اهلها ويقولون فلان خطبك
خلود: ياماجد رهف هذي اطيب انسانه على الوجود لكن الله طيحها بأب سيئ جدآ ماكنه ابوها من يوم ماتخرجت من الجامعة كل ماخطبها أحد رفض يقول ليه ماحد خطبها وهي تدرس ليه ماخطبتوها الا بعد ما توظفت والبنت عايشة معه هي وزوجته عيشة الشغالات لا تلومها ياماجد اذا تتطمن انه ابوها وافق على الخطبة أو لا..
ماجد: الله يعينها ويفرج كربها وكرب بنات المسلمين
خلود: آمين ويتمم هالخطبة على خير...
دق جرس البيت)
ودخلوا الضيوف مجلس الحريم..
منيرة: يالله حي من جانا تو مانور البيت ياخالة..
لطيفة: البيت منور باهله يا ام صالح
منيرة: تفضلوا العصير هذي بنتي أبرار..
كانت ابرار تقدم العصير بكل حياء ونعومة مصطنعة الحريم قعدوا يطالعونها من فوق لتحت صحيح انهم سلموا على بنات منيرة عند الباب بس برضك مامنع انهم يطالعونهم ويتفحصونهم بعد ماجلسوا بالمجلس..
لطيفة: ماشالله يا منيرة بناتك اكبروا اتذكر آخر مرة شفتك يوم ابرار عمره سنتين وانتي حامل في الثانية
منيرة: أي ياخالتي الايام تمشي والحمدلله اللي جمعنا فيك مرة ثانية هذي ابرار الكبيرة أولى كلية وهاللي جالسة أثيرواللي جنبها آخر العنقود أفنان
لطيفة:أي ماشالله عليهم..
******
**********
..نبذة عن عائلة لطيفة أم عبدالرحمن..
لطيفة: امرأة قوية شخصية وقوية بأس ذكية جدآ ياكثر ماغلبت رجال مات زوجها وهو كان في احدى مزارعه يراقب العمال إثر أحد العمال اللي كان راكب دركتر موجود بالمزرعة وكان صوت الدركتر عالي والعامل يمشي بالدركتر مو منتبه انه ابوعبدالرحمن كان مدنق عالارض ويشيل شي من الارض ومن قوة الصوت ما انتبه ابو عبدالرحمن ان الدركتر قرب منه وللاسف انصدم ابوعبدالرحمن وتوفى حالآ بعد ماجابت منه لطيفة خمس عيال وتركلهم فلوس واراضي واملاك لاتعد ولا تحصى ,,تحب عيالها حب جنوني كريمة معهم ربتهم احسن تربية وطلعتهم رجال كل واحد وظيفته احسن من الثاني..
عبدالرحمن: هو الولد الأكبر للطيفة يشغل منصب كبير في مجلس الشورى رجل مطيع لأمه لأبعد الحدود يعشقها عشق الجنون كريم ومن النوع البارد يدور خاطر في كل شي يسويه..
منى: زوجة عبدالرحمن انسانه عاقلة ومطيعة وفيها شوفة نفس اول ماتزوجت عبدالرحمن كانت تختلف مع امه كثير بس أدبها عبدالرحمن بطرقه الخاصة وسارت تسمع كلامه وتطيع امه,, عندها هي وعبدالرحمن اربع عيال أسيل وأسماء وفيصل ومحمد..
تركي:الولد الثاني للطيفة دكتور بجامعة الملك سعود انسان طيب وربته امه عالطاعة والولاء يحب زوجته حب الجنون..
ايمان:زوجة تركي كل يوم تعيشه مع تركي تعتبره يوم عسل ومثل منى أول ماتزوجت تركي ما عجبها الوضع مع أمه لكن تركي قوى قلبه وخيرها بين البقاء أو الرجوع لبيت أهلها لكن اختارت البقاء مع حبها الأبدي فيها شوية لقافة,, وعندها هي وتركي توم بنات سارة وسيرين وولد اسمه عبدالرحمن على اسم أخوه الكبير..
خالد: الولد الثالث للطيفة هو غير اخوانه كلهم يختلف عنهم بكل المقاييس مايمشي الا اللي في راسه ماحد في الوجود يقدر يغصبه على شي هو مايبيه أبدآ قوي شخصيه ومتمرد جدآ هو االوحيد اللي يعاند امه في كل شي يعشق السفر للخارج والسهر مع زملاءه لكنه ناجح بحياته العملية مهندس في شركة للبتروكيماويات..
عبدالاله: نقيب طيار الولد الرابع للطيفة اعزب انسان عملي ونفس تربية أخوانه عبدالرحمن وتركي ساكن بجدة ويزور أهله كل ما أخذ إجازة..
مشاري: آخر العنقود شاب مطيع لأمه لدرجة انه حريم أخوانه يسمونه بينهم دلوع الماما اتكالي جدآ لو تقوله امه ارمي نفسك في النار أول شي يزعل ويبرطم بعدين يقول (ok Mamy.....) كلمة توديه وكلمه تجيبه ثالث جامعه حاسب آلي..
.........
..............
.....
منيرة: ماعرفتينا ياخالتي ام عبدالرحمن على حريم عيالك.؟؟
لطيفة : تامرين يا ام صالح هذي منى زوجة ولدي عبدالرحمن والثانية ايمان زوجة تركي..
منيرة: أي ماشالله لا اله الا الله مازوجتي الا اثنين من عيالك بس؟؟
لطيفة: أي يا ام صالح وعبدالاله في الطريق..
منيرة بلمت ومو فاهمة وشقصدها انه في الطريق..
لطيفة: خطبناله وحدة من اقاربنا وانشالله زواجه بالصيفية
منيرة انقلب وجهها وخربت ملامحها وقالت بنفسها هذا عبدالاله وراح وانا بغيت عبدالاله لاثير وخالدلأبرار بس الظاهر يا أثير ان مالك بالطيب نصيب ياللاه بس الحمدلله أهم شي خالد وانشالله بإذن الله يا ابرار انه من نصيبك وأثير بيجيها رزقها..
لطيفة: الا اقول ماشالله بيتكم هذا ملك يا ام صالح؟؟
منيرة: أي الحمدلله يا خالتي
لطيفة: الا صح انا اتذكر انك تزوجتي ابو صالح وهو عنده بنت من زوجته الاولى الله يرحمها وينها اعرست..
وتتذكر منيرة انها قايلة لرهف تنزل قبل ما يجون بس وينهي الله يفشل العدو لا يحسبوني الحين طاردتها لاتقعد معنا وياخذون فكرة اني شريه عليها..
منيرة: لا والله يا خالتي ما اعرست ما بعد جاها نصيبها وهي فوق الظاهر انها تصحح ولا تحضر أفنان وانا امك روحي نادي أختك؟؟
منى: ليه هي ماشالله مدرسة
منيرة:...هاه أي أي مدرسه....
....
........
وتطلع أفنان وتدخل على رهف وتلقاها جالسه على طرف السرير وعيونها عالارض سرحانة تفكر بوليد اذا جا بكرة وابوها هل بيسوي مثل كل مرة ويطرده..
أفنان: ماشالله أنا شغالة سايرة طالعة نازلة أناديك ياست رهف
رهف:بسم الله الرحمن الرحيم احد يدخل من غير مايدق الباب ويصرخ على الناس؟؟
أفنان: أقوووول أنا مو وحدة من طالباتك عشان أدق عليك الباب وبعدين خير ليه ماتنزلين الناس تحت وانتي قاعدة مسويه عمرك سندريلا ومرة أبوك مخبيتك ياللاه اخلصي انزلي امي تبيك..
رهف:يووه نسيت,, الحين الله يعيني على امي منيرة بتقعد تقولي ليه مانزلتي عاونتي خواتك؟؟
..
...
وتنزل رهف بعد ماشافت نفسها نظرة أخيرة بالمراية وتدخل مجلس الحريم ...
رهف: السلام عليكم
الجميع بعد تتنيح استمر لمدة ثواني :..... وعليكم السلام
جت رهف ومسكت ام عبدالرحمن وسلمت عليها وعلى راسها وبعدين على حريم عيالها ...
وجلست على كنبة لشخص واحد وعينها بالارض كعادتها..
ام عبد الرحمن لا اراديآ قعدت متنحة في رهف ,,,,
ونست انها خلصت كاسة عصيرها قامت مدت ايدها الما الطاولة وهي عينها مانزلت من على رهف وخذت الكاسة وحطتها على فمها تستنى العصير ينزل بس التفتت منى زوجة ولدها عليها :
ياعمه عصيرك خلص كاستك فاظية مافيها شي عطشانه تبينهم يزيدونك
ام عبدالرحمن: هاه لا لا خلاص ارتويت
ام عبدالرحمن: ماشالله انتي رهف
رهف: أي نعم
الكل: ماشالله تبارك الله
منيرة طارت عيونها وعلى طول التفتت على رهف: رهف وانا امك شيلي كاسات العصير وجيبي الحلا والقهوة..
رهف: انشالله
وقامت رهف تشيل كاسات العصير وتحطها بالصينية والكل عيونهم مانزلت من عليها..
منيرة يوم شافت انه نظرات الاعجاب تزداد بهالرهف عصبت وتذكرت انه المفروض تقوم بناتها وبس مو رهف..
منيرة بعصبية: ابرار اثير قوموا ساعدوا اختكم..
....
......
وتمت الجلسة سوالف وحش وهذي تزوجت وهذي تطلقت وهذي ماتت وهذي انكسرت وهذي انمصعت وكل شوي عيون ام عبدالرحمن تطيح على رهف وهي ساكته ولا تتكلم وتنقل نظراتها بكل وحدة تتكلم بالمجلس واذا طاحت عيونها بعيون ام عبدالرحمن استحت ونزلت راسها على عكس ابرار اللي كانت ضحكاتها رنانة وتتكلم عن ستار اكاديمي وعن الموضة وعباية الراس وعباية الكتف وانه الغطا مو شي اكيد على ان البنت محترمة ومؤدبة وهالكلام ماعجب ام عبد الرحمن ابدآ...
كان الكل يسولف الا رهف سرحانة وبعالم ثاني كل تفكيرها منحصر ببكرة وايش رح يسير بين وليد وابوها وكل ماجت تقوم للمطبخ جلستها أم صالح وقالتله ارتاحي خواتك بيزينون كل شي..
****
.......
:::::::::::
:::::::::::::::
إيمان:ولا ها يارهف انتي وشرايك..
رهف تطالع وهي طايرة عيونها ولاتدري اش السالفة,,,,,,
منى: لارهف أبد مو معنا الظاهر كل تفكيرها بالمدرسة وطالباتها أو انها خلاص طفشت منا ومن سوالفنا وتبينا نروح..
رهف: لا والله أبد بالعكس منورين بس يمكني مصدعه شوي
إيمان:لا سلامتك ماتشوفين شر بس احنا نحكي عن سواقة الحريم للسيارات بالسعودية..
قامت رهف ابتسمت وقالت فنفسها أشوا اني كنت سرحانة لأن الموضوع جدآ سخيف..
إيمان: هايارهف قوليلنا رايك في هالموضوع..
رهف: والله يا ايمان الراي لاصحاب الراي مجلس الشورى والأمير نايف الله يحفظه ,,,,,احنا عندنا بالسعودية السواقة ممنوعة منعآ باتآ ..
ابرار: دارين انها ممنوعة ماجبتي شي جديد بس المفروض مايمنعونها لان السواقة لنا شي ضروري وخلاص احنا عدينا من مرحلة التخلف والواحد يصك على بناته ولا في طلعه الا يا معاه يا مع اخوها الحين البنت لها حاجيات ومشاوير لازم الوحدة تقضيها بنفسها مو تقعد تستنى رحمة هالرجال..
قامت رهف ابتسمت وقالت: لا سمحوا بالسواقة ذيك الساعة يسير خير,,,,
منى :بس انتي ماقلتيلنا لا سمحوا للسواقة بتسوقين يا رهف؟؟
رهف: لا والله معليش انا خوافة مرة ما اتخيل نفسي ورى دركسون وأسوق واذا صار هالشي أتوقع انه نص شباب الرياض بيكونون بالمستشفيات لاني مابخلي احد مابصدم فيه..
الكل ضحك والتفتت منى على اثير: وانتي يا أثير بتسوقين؟؟
أثير: والله انا ما اعرف الا أسوق بالبلاي ستيشن سبيد ويخب علي..
تعالت الضحكات بزيادة بعد تعليق أثير البريء
ابرار: لا والله انا الصراحة أذا سمحوا بالسواقة والله والله مابخلي مكان سوق قهوة ما أروحها ولا أخلي شارع ما أفرفر..
هنا منيرة ناظرت في أبرار نظرات كلها تهديد ودها تقوم تسطرها عشان تستحي على وجهها وتبطل كلام هالمراهقات اللي مايمشي عند العجايز أمثال أم عبدالرحمن.
منى:الا صح يارهف انتي شتدرسين؟
رهف:ادرس مادة أحياء
منى: أو ماشالله
إيمان:كم لك سنه تدرسين الحين يارهف؟
رهف: خمس سنين
منى: ماشالله تبارك الله
-----
---------
مرت الزيارة على سلام وجا سواق ام عبد الرحمن وراحت بعد ما خذت من ام صالح وعد انها تزورها هي وبناتها ورهف...
***
*****
*******
وليد: ها يبه اشقلت؟؟
ابو وليد: والله ياولدي الراي رايك والشور شورك دام اختك متأكدة من أخلاق البنت والبنت سمعتها طيبة توكلنا على الله..
بس اسمع ياولدي هما البنية تقول ان ابوها شري وكذا مرة فشل ناس جو يخطبونها وشاللي يضمنك انك ماتلحق اللي قبلك .. وبعدين ياولدي ياكثر بنات جماعاتنا وشزينهم وشحلاتهم وبنات رجال إذا تبي طالبة واذا تبي موظفة وناس سمعهتم طيبة وهذي على حد علمي انها اكبر منك بسنتين خذلك وحدة أصغر منك ياولدي أزين تدلعك وتدلعها وتشيلك اذا كبرت ..
وليد: يبه انا ابيها هالبنية حتى لو ماكانت منا وفينا وحتى لو أكبر مني سبحان الله مع اني لاقد شفتها ولا حتى سمعت صوتها الا اني متعلق فيها بمجرد ماتكلمت عنها خلود كذا مرة... وبعدين يا يبه اذا على سالفة أكبر مني لاتنسى ان الرسول عليه الصلاة والسلام تزوج خديجة رضي الله عنها وهي أكبر منه بعشرين سنه مو بس سنتين وبعدين يا يبه البنيه كريمة مابخلت على ابوها وهو مذوقها الويل,,,و انشالله اذا الله كتبلي بنصيب اني اتزوجها بتساعدني ولا تنسى يا يبه انه وظيفتي مو لاهناك..
أبو وليد بعد صمت: ..... الله يقدم اللي فيه الخير الحين الوقت تأخر روح وأنا أبوك ريح ونام وبكرة الله يحلها... الا صح متى بنروح عندهم؟؟
وليد: انا اباخذ الوصف بعد صلاة الجمعة والروحة عندهم بعد صلاة العصر..
أبو وليد: على خير انشالله..
-------
----------
عبدالرحمن: هايمه كيف قرايبك اللي رحتيلهم اليوم؟؟
أم عبدالرحمن: أي ماعليهم الله يستر عليهم
عبدالرحمن: عسى استانستوا
أم عبدالرحمن: ايه الحمد للله الا ما كلمك أخوك عبدالاله ,,اليوم أنا ماسمعت صوته؟؟
عبدالرحمن:الا يمه كلمني ودق على جوالك بس انتي ناسيته فوق مكتبة التلفزيون
ام عبدالرحمن: شخباره
عبدالرحمن :يسلم عليك بعدين يا يمه هو كل يوم يكلمك بيأثر لو مر يوم ماسمعتي صوته؟؟
ام عبدالرحمن: ياولدي لو يمر يوم ماسمعت فيه صوت واحد منكم ابنهبل
عبدالرحمن: طب وخالد ياكثر مايغيب عليك بالاسابيع وانت ماتسمعين صوته
ام عبدالرحمن: خل خالد دواه عندي بس اسمع ماقالك عبدالاله ابو خطيبته متى يبي العرس بأي شهر؟؟
عبدالرحمن: لاوالله ماظنيت انه فاتحه بهالموضوع لو فاتح عمه وحدد معه شي كان قالي
أم عبدالرحمن: أيه زييين أشواا
عبدالرحمن: ليه أشوا انتي ودك العرس يتأجل يمه بس اللي اعرفه انك مستعجله على زواج عبدالاله اكثر منه؟؟
أم عبدالرحمن: لا ما ودي يتأجل بس ودي يستنى أخوه خالد الين نخطبله ويعرسون مع بعض
عبدالرحمن يضحك ويناظر لامه بعين عتب:
يا الله يا يمه ما تعبتي من هالسالفة رجعتي على سالفة انك تخطبين لخالد
أم عبدالرحمن: شوف يا عبدالرحمن أخوك هذا بيتزوج مع أخوه الصيفية الجاية لا وبيتزوج البنت اللي اختارها له مو أي وحدة وبيسمع كلامي زيه زيكم أخوه عبدالاله أصغر منه بثلاث سنين بيعرس وهو معند ولا يبي ليه وشعنده..
عبدالرحمن:يايمه انتي ماتعبتي من المشاكل ريحي عمرك ولاعليك منه والزواج يايمه مايجي بالغصب ومصيره بيتزوج الحين ولا بكرة
أم عبدالرحمن ساكته وسرحانه:
الله يهديه هالولد ماحد تعبني منكم زي ماتعبني هالولد وهبل فيني لكن ماش البنية دخلت براسي وبيعرس مع أخوه على هالبنية يعني بيعرس عليها
عبدالرحمن: أي بنيه يمه؟؟
أم عبدالرحمن: شفت بنت اختي اللي رحت عندها اليوم؟؟ ماشالله ياعبدالرحمن يارجلها عنده بنية تاخذ العقل مزيونة ومحترمة ورزينة وعاقلة لا وبعد مدرسه واذا ماخاب ظني انها ماهي بصغر منه بواجد أويمكنها في سنه بعد ..
عبدالرحمن: في سنه وللحين ماتزوجت لايكون تعبانه يمه ولا سمعتها ماش تكفين يمه الولد يالله يالله قدرنا نمسكه لاتخلينا ندبسه بوحدة ماتصلح همن يجيب العيد لا أخذها ويقول هذي خيرتكم تكفين يايمه الا الزواج يبيله اختيار صح
أم عبدالرحمن: لا لا ياعبدالرحمن انا نظرتي ما تخيب وياكثر ماشفت بنات مزايين ومارتحت لهن ولا خطبتهن لكم وبالأخير طلعت نظرتي فيهن صح وهذا أنا اخترت لك وللثاني وللثالث وكلكم مرتاحين معهن صح ولا لا؟؟
بعدين ياولدي باين على ذا البنية انها بنت حلال وبنت اخيتي موريتها الويل منيرة واعرفها من يوم هي صغيرة كلبتن جربا وانا اعرف شطانتها وقلة أدبها ولعانتها خطبها ولد عمها وهبلت فيه وفي امه وفي عمها ولا تحشم لا صغير ولا كبير الين ولد عمها عرف لعمره وطلقها قبل لا يتوهق ورجع أخذها سلطان أبو هالبنية عشان تربيله بنته وتعاونه فيها ويوم اخذها مسكت البنت وعذبتها وطردتها عند جدتها أم أبوها ويوم ماتت الجدة الناس كلوا وجهها هي ورجلها ورجعت خذتها عندهم
وباين من عيون هالبنية انها مطيعة وحشيمة والدليل انها مستحملة العيشة مع منيرة وابوها..
عبدالرحمن:أبوها ليه اشفيه ابوها بعد وشمزين؟
أم عبدالرحمن: أبوها سامعتن عنه من يوم انا لسه بحايل وعن لعانته يقولون ان كل ما جا احد تقدم لهالبنية المسيكينة رفظة ومسح فيه الارض كل هذا طمع براتبها واللي اسمعه ان المسكينة ساكته ولا تقدر تقوله حرف ومسلمه امرها لله
عبدالرحمن: أعوذ بالله طيب يمه انتي ماتخافين لارحتي تخطبينها يسوي نفس اللي سواه باللي قبلنا وبعدين يمه انتي بتزوجين خالد عشان تفككين عقد بنات الناس وتصلحين الكون؟؟
أم عبدالرحمن: لا تنسى ان منيرة بنت اختي وانا اعرف اشلون اخليها توافق وهي لاوافقت سلطان غصبن عنه بيوافق,,,, وانا مابي افكك عقد احد على قولتك او اصلح الكون ,,البنت عاجبتني وانا احس انه مابيعقل خالد الا هالبنية..
عبدالرحمن:بالأول خلي خالد يوافق بعدين ابدي اقنعي منيرة على قولتك
............
,,,,,,,,,,,,,,,
.............
انتهى الجزء الأول
وشسبب عقدة رهف من انه يجي أحد يخطبها؟؟
وهل بيوافق ابو صالح على وليد؟؟
وهل بيسمع خالد كلام أمه ويسير مثل أخوانه؟؟؟
ومن البطل الغير متوقع لهالقصة؟؟
(الجزء الثاني)
كانت تغسل مواعين الغدى...
ماسكة الكاسة بيد واليد الثانية فيها ليفة المواعين وبالها مشغول على زيارة وليد لأبعد درجة وطول الوقت بنفسها تردد: الله يستر..
وللأسف تمر أكثر ذكرى أليمة مرت عليها في حياتها لما جى نواف ولد خالتها خطبها أول سنة لها بعد ماتوظفت وتذكرت الفظيحة اللي تكلمت عنها كل جماعتهم لما أبوها هزأ نواف وطرده برا البيت وتفل في وجه أبوه وصار يعايرهم قدام الرجال اللي بالمجلس أنهم شحادين وسب خالتها وتجرأ حتى أنه يسب أم رهف في قبرها وقال إن حتى وهي ميته وفقبرها تجي المصايب منها وعلى طول دقوا بنات خالتها خوات نواف اللي كانوا صديقاتها وتحبهم بشكل كبيرعليها وقالوا لها كلام ماينقال >>انتي على ايش شايفة نفسك انتي وابوك ترى نواف يستاهل احسن منك بس احنا قلنا نخطبك شفقة ورحمة إلا وحدة زيك ماتستاهل إلا واحد نذل زي أبوك عشان يعرف يتعامل معاك لكن هين يارهف أخوي وأبوي ينسبون وينشتمون عشانك لكن الله لا يوفقك...
ورجعت لأرض الواقع لما فجأة ماحست إلا بألم فظيع بكفها,,, طالعت بيدها لقت إن الكاسة أنكسرت بيدها وانجرحت يدها جرح مؤلم جدآ لأنه بالها ماكان معها وكانت من شدة سوء الذكرى عليها شدت عالكاسة بكل مافيها الين انكسرت بيدها,,,,
تركت الكاسة من يدها وغسلت يدها من الصابون وخذت فوطة نظيفة ولفت فيها إيدها لكن النزيف عيا يوقف والألم كل ماله يشتد ضغطت على إيدها بقوة وجلست على الكرسي وقامت تصيح من حدة الألم ومن الضياع والخوف اللي هي تحس فيه
...
أثير: يوووه رهف وشفيك؟؟
رهف ووجها مغطى بالدموع: اسكتي أثير أبوي لا يسمعك مافيني شي
أثير: رهف الفوطة البيضا اللي بيدك كلها أحمر
رهف لا تعليق ترتجف من البكى والألم
... ركضت رهف من غير ماتقول لأمها شي لأن لو أمها تدري بتروح تهزئ رهف وتقولها كم مرة قلتلك بلا فغارة وانتي تشتغلين بالبيت..راحت أثير تركض لغرفة صالح وصالح كان نايم ولا صلى صلاة الجمعه ولا يفكر يصليها لأنه مابقى على أذان العصر شي وجت عنده أثير تناديه بكل مافيها وهو مايرد آخر شي قامت تهزه بكل قوتها..
أثير: صالح قوووووووم
صالح: وجع انشالله وشتبين؟؟
أثير: صالح الحق على رهف,,,
صالح يرجع يغطي وجهه باللحاف: خير وشفيها
أثير: الحق ياصالح رهف ايدها انقطعت قطع مره مخيف واخاف أقول لأمي وابوي يهزءونها تكفى يا صالح قوم انت ودها
..صالح يقوم بكل تثاقل ويفرك عيونه بصابعه خلاص خلتلبس عباتها وأنا ابكون بالسيارة وخليها تلحقني..يوم دخلت رهف السيارة انفجع من ايد رهف اللي انقلب لونها للون الأسود من شدة الألم ولما شاف الفوطة اللي كانت لافه ايدها فيها مليانه دم..
صالح ردد في نفسه لا حول ولا قوة الا بالله وانطلق للمستوصف بدون أي تعليق وهو يسمع بكاء رهف المخنوق.. ولما دخلوا عند الطبيبة سوت لها خمس غرز وكانت رهف تحس بدوخة لدرجة أنه والطبيبة تخيطلها الجرح رجعت راسها رهف على ورى وغطت في نومة من غير ماتحس كان صالح يحاسب في الاستقبال برا ولما دخل يشوف رهف خلصت ولا لا انصدم وخاف لما شاف شكل أخته طالع في الدكتورة بكل خوف:
صالح:دكتورة وشفيها نايمة؟؟
الدكتورة: لأه مافيهاش حاقة بس الزاهر إنه الألم شديد عليها أوي..
...
.....
ركب صالح ويا رهف السيارة وكانت رهف ما تحس بيدها أبدآ وتحس بألم فظيع..
رهف بصوت متعب وياللاه يالله قادرة تتكلم: كم دفعت ياصالح؟؟
صالح:انتي كيف ايدك الحين؟؟
رهف: انا زينة بس انت كم دفعت؟؟
صالح: بعدين أقولك كم دفعت عشان ترجعيلي لا تخافين ما أسكت عن حقي..
**وسكت صالح وسكتت رهف بس صالح أبدآ في نفسه ماكان ناوي انه يقولها كم دفع ولا بيقولها بعدين,,بس كان يلعب عليها عشان تسكت وترتاح لأنه مهما صار هذي أخته وهو مره رحمها يوم شاف الألم اللي هيه فيه..
**رهف كانت تعرف انه أخوها طالب بالجامعة وعلى الله وعلى هالمكافأه والكم ميه اللي تعطيه أمه من حقه يتمتع فيها مو يصرفها عليها وكمان أبوه مايعطيه ولا ريال..
رجعت رهف البيت وتعمدت انها تطلع فوق من غير ماتشوف أحد لأنها مرة تعبانه وتبي تنام ولا لها خلق أي تعليق...
&&&
&&&&

(بمجلس الرجال)
أبوصالح:طيب انت وشوظيفتك؟؟
وليد: موظف في الاتصالات..
أبوصالح:طيب كم راتبك؟؟
وليد:ثلاثة آلاف...
أبوصالح:وتتوقع تفتح بيت مع هالراتب وتعيش بنتي؟؟
وليد وهو حاس بالإهانة:مسألة البيت مسألة بسيطة ابستأجر شقة واعيش فيها
ابوصالح:طيب ياعم سالم بصراحة أنا من أول مادخلتوا علي انت وولدك وطلبتوا ايد البنت وانا مستغرب كذا سؤال يدور ببالي من دلكم علينا؟ وشاللي مخلي ولدك يترك بنات الجنوب كلهم ويجي يخطب وحدة من الشمال؟؟
سالم:ليه يابوصالح الجنوبيين فيهم عيب؟؟
سلطان: لا والله مو القصد على راسي والله بس معقولة ولدك مالقى وحدة من جماعتكم تلوق له وبعدين ولدك صراحة يوم قالي عمره انصدمت انت تدري ان بنتي أكبر منه بأكثر من سنتين واللي اعرفه عنكم يالجنوبيين انكم ماتحبون تاخذون لعيالكم بنات معدين سن العشرين فشاللي خلاكم تتنازلون عن هالشرط؟؟
وليد: بصراحة يا عمي أنا العمر آخر ما أفكر فيه وأنا جاي شاري بنتك وشاري سمعتها الطيبة واخلاقها وكلي طمع انك توافق احنا بنعطيكم مهلة تفكرون وتسألون عنا وبعدين اللي تامر فيه ياعمي انت ورهف رقبتي سداده..
سلطان:معليش ياولدي أنا الشي اللي مايدخل مزاجي ما أخاطر فيه أبد ولا أتعب نفسي فيه بعد وش الله حادني أسأل واتعب عمري وانا مو مقتنع...
آسف ماعندي بنات للزواج....
سالم: يابوصالح فكر لاتقطع رزق بنتك وهي ممكن انها بتعيش مع ولدي احسن عيشة
سلطان: أحسن عيشة بيعيشها ولدك انشالله مع غيرها وبنتي اذا بغيت أزوجها ماأزوجها واحد يعيش على راتبها ويقول اني شاريها ولدك لو هو صادق انه ماتهمه الا الأخلاق خلاص ياكثر العوانس عندكم يالجنوب يروح ياخذله عانس ساقطة ثالث متوسط وقاعدة بالبيت ويعيش معها ماهو يطمع في راتبها ويقول انه يبي يتزوج ,,,ولدك يبي يستفيد وانا للأسف بنتي مو مكينة صراف يستفيد منها؟؟
أبو وليد: يا بو صالح.. ويقاطعه وليد بكل عصبية: يبــــــه خلاص مشينا..
أبوصالح: حياكم الله لاتقطعونا ونسمع خبر زواج وليد قريب انشالله....
وليد:ياللاه يبه مشينا..
....ويقوم سالم وولده وليد وهم حاسين بالندم على هالخطوة اللي خطوها وخيبة الأمل
ويركبون سيارتهم وأول ماركبوا السيارة طلع سالم حبوب السكر من جيبه وقال لوليد يوقف عند بقالة عشان يجيبله موية صحة ويشرب حبته لأن السكر ارتفع عليه بشكل كبير وكان وليد حاس بتأنيب الضمير على الإهانة اللي سببها لأبوه انه حطه في موقف جرح كرامتهم كلهم..
وقف وليد بالسيارة عند باب البيت وبكل كآبة وخيبة أمل وحزن يحاول انه مايظهره لأبوه: خلاص يبه وصلنا تفضل انزل..
سالم: وانت وانا ابوك ورى ماتنزل بتروح مكان؟؟
وليد: ها....ايه ايه بروح اجيب ثيابي من الغسال لهم يومين خالصات وماجبتهم..
سالم:ياولدي انت انزل الحين وادخل داخل وارتاح ولا تضيق صدرك الله موبكاتبها لك ياولدي خلاص الله يعوضك باللي أحسن منها..
وليد بابتسامه أليمه يالله قدر يرسمها على وجهها: لا يابوي ماني بضايق صدري خلاص هذي كتبة الله والبنات ياكثرهم والحين انت وراك منت مصدقني انا رايح الغسال اجيب ثيابي تحسبني زي الافلام اقعد ادوج بالشوارع وابكي ولدك رجال يبه لاتخاف..
بعد هالكلمات اللي قالها وليد حب ابوه على راسه ونزل سالم ودخل بيته.. وليد كان يكابر كل الكلام اللي قاله لايمت للواقع بصلة كان منهار من جوا حلم عمره تهدم حس بأن هذا عقاب من الله لأنه بس فكر تفكير بسيط إن رهف تعاونه براتبها ويستفيد وهذا جزاه لكن فكر إن هالشي ماكان غايته أبدآ وان اللي يبيه هو رهف وبس,, دور بين الأشرطة ولقى شريط إبراهيم الحكمي وعلى طول شغل أغنية ((شوبني))
000مابدي إلك شوبني
شاللي جرالي بهالدني ,,,,بدي معك ابدا العمر أول سطر بالولدنه
ولابدي احكي شوحصل ,,,,شو اللي كسر في الأمل
واللي ألب ضحكي زعل ,,,,غربني ياما وردني
وبعدها دق جواله وقام قصر الصوت وناظر ولا ,,,(البيق سستر ...يتصل بك)
بغى يصك جواله ولايرد على أحد بس قال ماله داعي يخوف أحد عليه ورد:
هلا خلود
خلود: هلا وليد تعال عندي ابيك امي دقت علي وقالتلي كل شي تعال ياوليد
**هنا وليد ماقدر يجادل كالعادة وعلى طول غير طريقه وانطلق لبيت أخته خلود لأنه يبي يتكلم مع أحد يفهمه ويفضفضله يمكن ضيقة الصدر اللي هو فيها تخف..
خلود:هلا وليد مرحبآ ألف تفضل..
وليد:هلا فيك زوجك موهنا غريبه مافتحلي الباب كالعادة
خلود:لا موب فيه مستلم ,,,,وليد حبيبي لاتضيق صدرك الله يعوض عليك وعليها
وليد: أنا ما شلت همي هين انا بتزوج لو ابي اربع لكن ضايق صدري عليها مسكينة
خلود: لها رب يكتفل فيها يا وليد
وليد:أنا مستغرب أبوها هذا مو انسان ياخلود ولايمت للإنسانيه بصله ماتتخيلين قد ايش رحب فينا وبيتشقق وهو يدخلنا بيته وفجأه تحول وسار زي الكلب المسعور تكلم علي وعلى أبوي وسبنا واتهمني ولا حشم شيبة ابوي يا خلود
خلود:قالته رهف ان ابوها دايمآ ردات فعله مو متوقعه وحذرتنا لكن خيره...
قام وليد ابتسم ابتسامه هاديه بكل ألم وقام يدق رقبه ويقول<<<
قاااااااال خيـــــــــــــــــــره ,,,,, وشلون خيره بعاده فرقاه لاتقولوا خيره
خيبـــــه كبيـــــــــــره...
....قامت خلود تضحك وعيونها مليانه دموع وقالت وصوتها يرتجف:
حتى بهالمواقف ياوليد ابتسامتك ماتغيب..
هنا وليد ماقدر يمسك نفسه رجع راسه على ورى وسند راسه وقامت دموعه تنزل على جنبات خدوده ويدعو من كل قلبه ان الله يفتح لرهف أبواب الرزق وييسر لها اللي يقدر يوقف أبوها عند حده بهاللحظه وقف وليد وبكل صوت متعب:
تبين شي أنا بروح البيت تعبان عندي دوام الصبح
خلود ماحبت تناقشه أبدآ ولاتنشب فيه: لاسلامتك ياخوي في حفظ الله..
وطلع وليد من بيت أخته وهو مصدع وموقادر يصحى من الصدمه وركب سيارته ومسك طريق البيت على أغنية محمد عبده (مذهـــله,,, ماهي بس قصة حزن)
*****
********
منيرة: روحي نادي ست الحسن تجي تاكل عشاها من العصر وهي مصكرة على عمرها وشعندها..
أفنان:والله ما أقوم ماني بشغاله عندها الآنسه كل شي وانا راقيه الدرج عشان اناديها
أبرار: خلاص يمه خليها متى ماتبي تاكل تنزل تاكل لاتزعجينا عالفاضي
طبعآ أثير نست سالفة جرح رهف بعد ماطمنها صالح ان كل شي تمام وماجابت السيرة للأحد....
****
*******
(في اليوم الثاني بالمدرسة)
أول مادخلت رهف كان واضح عليها ملامح الألم من يدها وكانت تبي تغيب بس عشان خلود ماكلمتها ولا قالتلها اش صار وهي مستحيل تسأل أبوها داومت مع الألم اللي تحس فيه جلست على مكتبها وشافت ان خلود مابعدجت قالت بنتظرها الين تجي وصلت خلود على رنة الجرس ودخلت خلود وهي مو قادرة تناظر برهف أبدآ حطت عباتها على المكتب وشنطتها بعد ماسلمت عالكل وتوجهت لساحة الطوابير عشان عندها الحصة الأولى استغربت رهف من حركة خلود لأنها أول مرة تسوي كذا؟؟
استمر تهرب خلود من رهف طول الثلاث حصص الأولى لكن في الفسحة لقت رهف خلود جالسة بغرفة المشرفة اللي كانت فاظية وماسكة مجلة تقرا فيها جت رهف وجلست قدام خلود ومسكت ايدها وقالتلهاوهي مبتسمه وعيونها كلها دموع:
زي ما اتوقعت ياخلود صح؟؟؟
..هنا خلود حظنت رهف وهدتها وقالتلها كل اللي صار مع وليد..
سكتت رهف وبعدين قالت: هذا نصيبي يا خلود ولا خيرة فيما اختاره الله ,الله يصبرني ويرزق وليد باللي أحسن مني..
خلود: ماظنيت في أحسن منك يارهف انتي ادعي الله وخلي ايمانك بالله قوي وانشالله يارهف تلقين من ضيقتك مخرج..وبعدين اشهذا اللي بيدك ليش ملفوفة لايكون ابوك هو اللي سوالك كذا لما خطبك وليد؟؟
رهف تضحك بكل حزن: لا عاد ماتوصل ان يقطع ايدي حشى ماصار بيت صار سجن أبو غريب...هههههههههههه
خلود بكل ألم وحزن بادلتها الضحكة وبعدين قالتلها رهف اللي صار بيدها..
...وبعد اللي صار بين رهف وخلود كانت رهف منصدمه وبالها مومعها وتعطي حصصها بالغصب لأن خلاص حست الدنيا اسودت بوجهها..
,,,,
,,,,,,,,
(في جامعة الملك سعود)
طارق: استقبل ,,, استقبل
مشاري: وش استقبل؟؟
طارق: مقطع رقص عراقي لبنات...
مشاري:يرحم امك حامت كبودنا منهم في التلفزيون مابي خلاص ,,,بس قوم مشينا يللاه..
طارق: يـــــاخي وين؟؟
مشاري:طارق المحاضرة بدت لها ثلث ساعة واحنا قاعدين يرحم امك خلنا نروح نحضر لايطردنا زي المرة اللي فاتت..
طارق يطالع للساعة: لابدري بدري,,, اسمع اسمع هذي أغنية عبد المجيد عبدالله الجديدة إنت منت إنسان أكثر [ويحط طارق إيدينه على خدوده وينزلهم بهدووء] ويقول:تجنننننننننن
قام مشاري يقلد نفس حركة طارق ويحط ايدينه على خدوده وينزلهم بنفس الطريقة ويقول:يااااااااقدمك غبااار بس اقول,,,أنا مالي شغل فيك ابحضرالمحاضرة مو مستعد انطرد عشانك
طارق:خلاص خلاص مشاري ابروح معك ساير هالأيام ابو شكيب دافور
مشاري: لاأبو شكيب ولا يحزنون بس اعرفك لو أعطيك فيس ابحمل كل المواد
طارق: الله لا يحرمني منك يامشاري لولاالله ثم انت كان انا آخذ السنة دبل
مشاري: يابعد عمري وانت بعد ياطروقي الله لا يحرمني منك
طارق: تصدق لو يمر يوم ما أشوفك فيه احس ان هاليوم كئيب ويالله يمر
مشاري: حتى أنت ياطارق غالي وتعودت عليك واللي مستغربه ان إنت الوحيد اللي مايسيرلي شي بحياتي الا اقولك ولا أخبي عنك ولا شي حتى لوكان يفشل
طارق:وانا نفس الشي يامشاري كل شي بحياتي أقوله لك لأنك أغلى شي عندي
مشاري يلتفت على طارق وهو يبتسم:
إي طب متى تملك علي طفشت وانا استناك تحس على دمك وتخطبني,,,,
.. وفجأه الثنين كل واحد منهم مات من الضحك على الثاني وكملوا طريقهم للمحاضرة وتموا يمزحون على بعض ويضحكون ويسولفون,,, طارق من أعز أصدقاء مشاري يعزه لحد الجنون وكل شي بحياته يقوله له لأنه وفي لمشاري وصديق بمعنى الكلمة الوحيد اللي يفهم مشاري وينصحه ويعاونه بكل شي..
,,,,,,,,
,,,,,,,,
,,,,,,,,,,,,,
(في بيت أم عبدالرحمن)
لطيفة:وين أسيل يامنى ليش ماتعشت معنا؟؟
منى:كانت عندها المدرسة وتوها مشت من عندها وهذي هي بالمطبخ اتعشى
لطيفة:أقول يامنى وشرايك ببنت رجل منيرة هاللي اسمها رهف؟؟
منى: ماشالله عليها ياعمه عاقلة ورزينة ومزيونة بعد بس ها لا تقولين تبين تخطبينها لخالد؟؟
لطيفة: أي انشالله وبإذن الله
منى: ياعمتي بس سمعة أبوها ماش
لطيفة: هي مالها ذنب واذا سيئ مع الناس تراه معها أسوأ وأنا سألت الناس اللي يعرفونهم يقولون البنية غير عن ابوها وعن منيرة ماكنها عايشة معهم أبد
وبعدين الله سبحانه و تعالى قال((ولا تزر وازرة وزر أخرى))
منى: بس لا تنسين ياعمه ان الرسول حذر من [خضراء الدمن] اللي هي البنية المزيونة في المنبت السوء
لطيفة: طيب يامنى انا بسألك انتي لك ذنب يوم انسجن أخوك عبدالمحسن مع ربعه بقضية وشكبرها وهزت أمن البلد ها يا منى تكلمي انتي لك ذنب يوم انسجن أخوك كنتي انتي وعبدالرحمن ماعندكم الا اسيل لو واحد ثاني بمنصب عبدالرحمن ومكانته كان شرى نفسه وسمعته وخاف على وظيفته وطلقك لكنه قال إن مالك ذنب وتمسك فيك وفبيته وفبنته..
هنا منى نزلت راسها ولا قالت ولا كلمة رجعت قالت أم عبدالرحمن:
البيوت أسرار يامنى وكل واحد وظروفه أنا ماأعايرك يامنى لكن أنا ماني بشايله الا هم خالد أشلون أبقنعه لكن انشالله ان هو وعبدالاله زواجهم بليله وحده..
:::::::::::::::::::::::::::::::::::::::::::::::::: ::::
::::::::::::::::::::::::
(في بيت أبوصالح)
أبرار: يووووه لااا وين بدري..
....: ياحياتي أذن الفجربروح أصلي وبعد ماصلي بنام كم ساعة قبل ما أروح للدوام
أبرار: أنا لسه ماشبعت منك...
....: وأنا بعد ماشبعت منك بس شسوي تبيني أنام عالمكتب عشان أتهزأ وخلاص انتي بعد ماودك تصلين؟؟
أبرار:..... سنسف ها...انـ انــ.. انشالله
.....: عمري ابيك تحافظين عالصلاة زي عيونك لأن زوجة المستقبل وام عيالي ابيها قدوة حسنه لعيالي طيب يادنيتي؟؟
أبرار: يابعد عمري يانصوري الله لا يحرمني منك انت تامرني أمر
ناصر: خلاص أجل تصبحين على خير ياقلب ناصر انتبهي لنفسك
أبرار: وانت من أهله الله لا يخليني من هالصوت
أثير: أخيرآ أخيرآ قفلتي يا جولييت انتي وروميو حسبي الله عليك انتي وهو ماخليتوني أنام هيه انتي تحسبيني زيك لاشغله ولا مشغله قاعده بالبيت ولاتروحين كليتك الا قبل الامتحانات بيومين تشترين الملازم ترى انا عندي مدرسة بعد كذا ساعة
أبرار: نامي يمديك تنامين وتقومين منتي بأحسن من ناصر
أثير: الله يعيني كنت أعاني منك,, الحين أعاني منك ومن ناصر...
______
__________
((في بيت وليد))
أم وليد: وليد الساعه