تااابع اخر جزاء اليوم من الرواية وانشاء الله راح نكمله سوااا الايام القادمه

(الجزء الخامس)
كانت راكبة السيارة وعيونها طول الطريق مانزلت من على مشاري...
مشاري لاحظ من أول ماركب السيارة إنها على هالحال وطفش من نظراتها:
شلتي كل أغراضك..
رهف:ها...ايه شلتهم كلهم
مشاري:طب وشرايك لوتناظرين قدام أزين..
رهف انحرجت ونزلت راسها وشبكت إيدينها ببعض وقامت تفرك فيهم لأنه أحرجها..
حس مشاري إنه أحرج رهف وحب يبعد هالإحراج لأنه ولو البنت ماقصرت معه طول اليومين اللي فاتت وهو تعبان....
مشاري:إنتي عندك جواز؟؟
رهف: لا ماعندي..
,,مشاري يقول في نفسه أشوا الحمــــدلله..
شغل مشاري سي دي للفنانة نوال الكويتيه لأنه كان يحب صوتها بشكل كبير ويخش جو لما يسمع صوتها...
ناظرت رهف لساعتها لقت انه موعد آذان المغرب مابقى عليه الاخمس دقايق..
ورهف كانت من النوع اللي عادي تسمع أغاني بس مي حريصة على فنان أو حريصة إنها تسمع كل شي جديد بس ماتحب تسمعها بكثره أو بآخر الليل,,,
رهف حست إنها متضايقة وودها تقول لمشاري يطفي بس ماتدري اشلون تبدا
رهف:مشاري
مشاري:...نعم؟
رهف:مشاري ترى مابقى على أذان المغرب شي..
ناظر الوقت بالسيارة لقاه بالفعل شوي ويأذن بدون نقاش صكر الأغاني..
....دخل مشاري سيارته بالحوش.. ونزل وقال لرهف:ياللاه انزلي..
نزلت رهف ومشت ورى مشاري وهو يمشي دخل مشاري للديوانية ووقفت رهف برا لأنها شافت نعال رجال وتوقعت إنه هذول إخوان مشاري داخل الديوانية وكانت تسمع مشاري وهو يسلم على إخوانه بحماس وعلى أمه وتسمع صوت أمه وهي تدعيله وترحب فيه وتتشره عليه...
لطيفة:مشاري وينهي زوجتك؟
مشاري:مدري عنها الظاهر دخلت جوا؟؟
رهف كانت تسمع مشاري يوم قال هالكلمة وحزت فخاطرها انه يقول مدري عنها..
كانت واقفة برا وماتدري وين تروح فكت نقابهاوجلست على سور الحديقة:
ياربي أخاف أدخل داخل ألقى واحد من أخوانه أنا ماعرفهم ولا أعرف أصواتهم ولاألقى أحد غريب ياربي مادري وين أروح يارب يطلع مشاري عالأقل يدخلني داخل أحسن من إنه يسيرله موقف يفشل مع أحد..الله يهديك يامشاري..
كانت جالسة وتناظر بالأرض وكان فيصل طالع من داخل ومتجه للديوانية وشاف رهف وقال:بسم الله من أنتي؟؟
رهف استحت ورمت الطرحة على وجهها وتمنت لو الأرض تنشق وتبلعها على هالموقف:أنا رهف..
فيصل رفع حاجب ونزل حاجب: من رهف..... إيــــــــه مرةعمي مشاري.
رهف كانت متذكرة فيصل لأنه هو اللي وصلها لسيارة مشاري يوم زواجها:
فيصل ممكن تدخلني أنا أخاف أدخل وأضايق أحد أو شي ..
فيصل: لاعمه رهف من إيش تخافين تعالي بس..
مشى فيصل ومشت رهف وراه
فيصل:يمــــــه,,يمــــه,,,أسيـــل
أسيل:نعم خير وشفيك تزاعق...,,, وتتنح أسيل بالمرة اللي واقفة ورى فيصل..
فيصل:هذي عمتي رهف دخليها.
أسيل تشهق وتطير لرهف:هلا رهف ياهلا والله تعالي حياك وشفيك..
وتاخذها أسيل مع يدها وتشيل رهف طرحتها من على وجهها ويسلمون على بعض وتنادي أسيل أمها وإيمان عشان يسلمون على رهف اللي كانت ملامح الضيق على وجهها..
راح فيصل الديوانية عشان يسلم على مشاري..
فيصل:ياااهلاااا والله بالعريـــــس
مشاري كان جالس جنب أمه ولما قرب فيصل عشان يسلم عليه مشاري ماقام ومد يده وهي مقلوبة كأن أحد يبي يسلم على إيده قام فيصل ضرب يد مشاري وقال:
عمو ميشو استح على وجهك أنا جاي اسلم عليك ولا جاي أطر..
ويقوم مشاري وهو يضحك ويحضن فيصل اللي قام يصارعه وكل واحد يحاول يغلب الثاني وعلى طول تعبوا وجلسوا وهم يضحكون..
لطيفة: خلاص ياولدي أخليكم أنا بروح أسلم على حرمتك أكيد إنها مستحية تدخل تسلم..
وتطلع لطيفة وتخلي عيالها مع بعض..
فيصل يقرب راسه من راس مشاري: مشاري ياخي صدق إنك طعس وجلف
مشاري: ليه وشفيه؟؟
فيصل:الحين تدخل وتقعد تسولف مع جدتي وأخوانك ومخليها قاعدة برا أقسم بالله يوم شفتها خفت..
مشاري:منهي,,من تقصد
فيصل: من أقصد ياحظي حرمتك رهف,,مسيكينة قاعدة بالحر ماتبي تدخل عندكم تستحي وخايفة تدخل داخل لأن ماحد يعرف عن جيتكم وتخاف تضايق أحد..
مشاري سكت وتنهد وتذكر همه رهف...
...كانت لطيفة جالسة جنب رهف وحاضنة إيدين رهف بإيدينها الثنتين وتسولف معها وإيمان ومنى جالسين قبالهم..
لطيفة:يابنات وراكم تنحتوا وين القهوة وين الحلى؟؟
إيمان ومنى ضحكوا واستحوا..
إيمان:إي والله ياعمتي من يشوف هالملاك وهالذوق ومايتنح ماشالله تبارك الله..
رهف استحت ونزلت راسها وعلى طول إيمان ومنى راحوا المطبخ يشوفون الشغالات وشزينوا..
إيمان وهي بالمطبخ:بسم الله على قلبها وشنعمها
منى:إي والله ماشالله تهبل بعذر عمتي انشبت إلا تاخذها
::
لطيفة: هايابنيتي بشري؟؟
رهف:وشو ياعمتي عن إيش
لطيفة: والله يارهف مادري شقولك بس إنتي أبخص
رهف:والله ياعمتي مافهمت إشقصدك؟؟
لطيفة:أنا أقصد دخلتوا؟؟
رهف:هاه..... إيه إيه ياعمتي
لطيفة:وانشالله انتي ومشاري خاطركم طيب
رهف وهي خايفة ومرتبكة:هاه....إيه الحمدلله
شوي ولا مشاري دخل عليهم: يمــــــــــه وينك رحتي وخليتيني مابعد شبعت منك؟؟
لطيفة:أنا هنا يامي تعال حبيبي تعال..
ويجي مشاري يبي يجلس جنب أمه من يمينها لأن رهف كانت جالسه على يسارها لكن لطيفة قالت:
وين وين خلك مني سنين وانت مقابل وجهي والله ماتجلس الاجنب حرمتك..
مشاري:يمه وش اللي سنين وانت مقابل وجهي ,,, ويجلس جنب رهف ,,
الله يصلحك يمه مرة ثانية لاعد تحلفين..
رهف:ولو ياعمتي انتي الخيروالبركة إنتي الأساس..
قامت لطيفة من عالكنب وقالت:الخير بوجهك يابنيتي ,,أذن العشاء بروح أصلي وانتوا صلوا ياعيالي ولا خلصتوا صلاة تعالوا للحلا والقهوة في الديوانية..
مشاري على طول التفت لرهف بعد ماطلعت أمه من الغرفة وقال:
أمي شكانت تقولك..
رهف:....ولا,,ولاشي
مشاري:رهف تكلمي أنا لمادخلت وجهك كان أحمر وأمي مايلة جهتك بزيادة وتشاورك وشكانت تقولك؟؟
رهف:لابس كانت تسولف..
مشاري مسك رهف مع ذراعها بقوة وقالها: رهف تكلمي احسلك!!
رهف خافت من مشاري ومن نظراته الحادة كانت أول مرة عيونها تطيح بعيون مشاري.. وعورتها يدها منه بلعت ريقها ونزلت عيونها تحت فيه:
كانت تسألني دخلت علي ولا لسه..
مشاري بعصبية بعد ماقوى يده عليها:وشقلتي؟
رهف دمعت عيونها وقالت: قلتلها إيه
مشاري هدت نفسيته شوي... ورمى يدها وعلى طول رهف مسكت مكان قبضة مشاري وعيونها بالأرض..حست نفسها ضعيفة ومابيدها حيلة لكنها عبرت عن ضعفها بمجرددموع عالخد,,
دخلت إيمان وهي لابسة جلالها عليهم:أهلين مشاري مبروك ياعريس
مشاري:الله يبارك فيك أنابروح أصلي
طلع مشاري ورهف متنحة بالوضع اللي قدامها,,,
؟
؟؟؟
؟؟؟؟؟؟
إشهذا إيمان تفتش على مشاري..
إيمان:هارهف ماتبين تصلين؟؟
رهف: إلا بس وين أصلي..
إيمان:الحين تجيك أسيل وتجيبلك جلال الصلاة..
وبسرعة جت أسيل وعطت رهف الجلال وحتى أسيل فرشت سجادتها وقعدت تصلي..
كانت رهف تصلي وبالها موبالصلاة أبدآ بس جالسه تعيدببالها المشهد اللي سار قدامها لما إيمان وقفت قدام مشاري مو مغطية وجهها...
يعني إيش يعني بيجبرني أفتش على أخوانه؟؟
سلمت رهف وقعدت على سجادتها وهي مازالت سرحانة..
أسيل:ياللاه رهوف خلنا نروح للقهوة بالديوانية..
رهف تفك جلالها وتسفطه:أسيل من بالديوانية؟؟
أسيل:أمي وأبوي وجدتي وعمي تركي وزوجته ,وميشو ,وفيصل.
رهف: معليش قوليلهم إني تعبانة وبطلع فوق أرتب أغراضي وارتاح..
أسيل:طيب عالأقل خذيلك كم فنجال واطلعي لا تطولين
رهف:لا معليش أسيل مرة تعبانة
::::::::
طلعت رهف غرفتها وجلست على طرف السريروقالت بنفسها :يالله الله يعدي هالأيام على خير..
:::::
(بالديوانية)
مشاري:خلاص يمه خلااااص كيفها ماتبي تتقهوى مو لازم
لطيفة:ياولدي روح شوف لايكونها تعبانة
مشاري:يمه يرحم أمك ماسمعتي أسيل وشتقول تقول بتروح ترتب أغراضها خلاص
,,,, وتموا لطيفة وعيالها يسولفون ويضحكون ..
مشاري:إلا صح عبدالاله شخباره بفرنسا ماكلمكم؟؟
لطيفة: إلا ياحبيله كلمني اليوم هو ومرته
فيصل:صح ميشو وين بتسافر شهر عسل؟؟
مشاري يقول بنفسه حسبي الله عليك يافيصل ورطتني:والله مادري بشوف المدام وأشوف خاطرها وين تبي تروح بعدين يحلها ألف حلال..
فيصل:خالي روح إنت وزوجتك بلجيكا,,,تتذكر يوم رحتها أنا وياك السنة اللي فاتت
إشلون كانت الرياض حر وقرف ويوم رحناها جوها جناااااان قعدنا فيها شهر كامل مابغينا نرجع..
لطيفة:إي والله ياولدي لازم أنت وحرمتك تسافرون وتنبسطون..
عبدالرحمن:خلاص أجل تكاليف السفر علي من الألف للياء..
,,,مشاري متنح ومصدوم من الحكي ومن التخطيط اللي حصل بدون ماحد ياخذ رايه..
مشاري:لا..لالا..من قال إني بسافر بلجيكا...سبحان الله أنا يوم رحتها ما ارتحت,,ومرضت ذيك الأيام وكرهتها,,وبعدين أصلآ رهف ماعندها جواز..
تركي:يعني هي شغلة يعني مايبيلها شي يمديك تزينه بفترة بسيطة..
مشاري:حتى أنا جوازي يبيله أجدده ...فاتفقت أنا ورهف إنا مانسافر برا اتفقنا نروح جدة..
أسيل:عمي حرام عليك بهالحرجدة؟؟
فيصل:عمي من جدك عريس وتبي تقضي شهرالعسل هنا؟؟
مشاري:يوووه...الحين أنتم وشحارق رزكم أنا ورهف متفقين وخلاص..
...بعد تعصيب مشاري على فيصل على طول تركي حب يهدي الموضوع وقال:
خلاص دام الخساير هينة وانتم بيكون شهر عسلكم هنا تكاليفة من تذاكر طيارة الى اقامتكم بالفنادق ومشترواتكم وتمشياتكم علي علي أنا..
مشاري:ياتركي مايحتاج..
تركي:خلاص..أنا قررت يامشاري ولا تناقشني.. كم عندنا مشاري..
مشاري: ماتقصر يا بوعبدالرحمن..
*
*
*
*
تموا يسولفون أفراد عائلة لطيفة الما جهز العشاء..
لطيفة:روحي ياسارة نادي عمتك رهف قوليلها ياللاه الكل يستناك عالعشاء
سارة:طيب ياجدة..
(بغرفة رهف ومشاري)
كانت رهف فاتحة شنطة ملابسها ومحتارة ياربي خلاص أعلق ثيابي ولا شالسالفة؟؟
بعد ما آلمها التفكيرواتعبتها الوساوس بأنه ماله داعي تتعب نفسها وتعلق ملابسها بدولاب الملابس لأنها أصلآ مو مطولة مع مشاري,, تعوذت من ابليس وخذتلها دش عالسريع وهي قاعدة تمشط شعرها شوي ولا الباب يدق..
رهف:مين؟؟
سارة: أنا سارة..
رهف قامت وفتحت الباب لسارة وجلست على كرسي الكمدينة ومسكت إيدين سارة وجلست تمسح على شعرها:
هاحبيبتي سارونة إشبغيتي؟؟
سارة:جدة تقولك ياللاه تعالي إنزلي تعشي..
رهف:طيب حبيبتي وين العشا فيه؟؟
سارة:العشا بصالة الطعام..
رهف:طيب من بيجلس هناك؟؟
سارة:كلنا بنجلس..
رهف:حتى عمو عبدالرحمن وابوك ومشاري؟؟
سارة:إي كلنا!!
..رهف سرحت شوي والتفتت على سارة قالت:
طيب حبيبتي استنيني عشان ابنزل معك..
سارة:طيب!!
كملت رهف لبس بغرفة التبديل اللي كانت جزء غيرمفصول من غرفتها ونزلت مع سارة للدور الأسفل..
رهف:حبيبتي سارة وين المطبخ؟؟
سارة:طب تعالي معاي أوريك..
مشت رهف مع سارة ودخلت المطبخ ولقت منى واقفة تعطي الشغالات أوامر وتوجههم أشلون يفرغون الأكل في الصحون وتشرف عليهم..
رهف:السلام عليكم.
منى التفتت على رهف وكان جلالها على كتوفها ولابسة جلابية ناعمة...وقالت:
هلا بعروستنا وشمدخلك المطبخ؟؟
رهف:لاعادي مافيها شي...تبين أساعدك؟؟
منى:الله يهديك وأنا سويت شي عشان تساعديني؟؟
رهف نزلت راسها وكانت مستحية وباين عليها إنه عندها كلام..
منى:رهف حبيبتي فيك شي تبين شي؟؟
رهف بصيغة سؤال:إحنا بنتعشى كلنا سوا؟؟
منى هنا فهمت سبب حيرة رهف وتذكرت أول أيام زواجها من عبدالرحمن لما كانت رافضة إنها تفتش على أخوانه لكنها في الأخير رضخت لرغبة عبدالرحمن..
ورحمت منى رهف وقالتلها: خلاص يارهف اليوم بتتعشين معنا احنا الحريم والرجال بنعطيهم عشاهم لحالهم بالديوانية..
رهف هدى توترها وخوفها بس قالت:
منى لايكون هالشي يضايق عمتي والعيال خلاص أنا بآكل بعدين..
منى:لايابنت الحلال مايضايق أحد,,
::
راحت منى ضبطت الأمور وخلت الشغالات يحطون العشى للرجال بالديوانية وهم تعشوا داخل..
عبدالرحمن نادى منى بالحوش وقالها:
منى ليه تخلونا نتعشى لحالنا بالديوانية وانتم داخل؟؟
منى:الظاهر مشاري ماقال لرهف عن طريقتنا هنا انه عادي نقعد مع بعض والبنية يا عبدالرحمن مستحية ومتوترة وخايفة فقلت دامها كذا وماتدري شالسالفة نقعد كذا يوم على هالحال الين مشاري وخالتي يفهمونها ويقولونلها..
عبدالرحمن:طب أمي ماقالت شي؟؟
منى:لا رحمت رهف وماقالت شي..
عبدالرحمن:الله يهدي هالولد له ثلاث أيام هو وياها متزوجين ولا قالها شي..
لكن ماشالله على عبدالاله قال لزوجته دينا من يوم ما ملك عليها واقنعها..
منى:والله ما ادري ياعبدالرحمن بس أنا من رايي ماتتدخل ولا تقوله شي خليتفاهمون بطريقتهم ومتى ماقالها قالها..
,,,,,ودخلت منى داخل مع عمتها وحمواتها...
******
**********
*************
(بيت أبوصالح)
صالح: إنــــــالله وإناله راجعون.. قلنااالك ياختي مشوار ساعة وراااااجع..
منيرة وهي تلحق وراه:طب وين تروح..قولي وين تروح..
صالح:موبلازم تعرفين..
منيرة:طب بتتأخر؟؟
صالح: إنالله الرجال برا يستناني وانتي ناشبتلي..
,,,,وطلع صالح بسرعة وصك باب الحديد وراه وامه برضه كانت لاصقة بظهره لو مادفها وصك الباب كان تحمست وطلعت الشارع بعد..
سعد وهو في السيارة مرتفع ضغطه:
لااا كان قعدت شوي..
صالح: يرحم أمك ياسعد ترى ضغطي مرفوع خلقه مو ناقصك..
سعد:ساعة وانا استناك ياصالح؟؟
صالح:ياخي أمي نشبتلي ..نشـــــــبتلي ياللاه ياللاه طلعت..
..سعد وهو ماسك الدركسيون فطس ضحك وقعد يضحك ويضحك...
وصالح يطالع في وهو مرتفع ضغطه ووده يمسكه ويزنطه..
صالح:لااا.. وشرايك تجنب بالسيارة وتكمل ضحك؟؟
سعد:ياخي انت وامك ذي نكته,,,ههههههههههههههههه
صالح: أخ سعد متى آخر مرة تصفقت فيها..
سعد:ههههه,,,تصدق ياصالح ماتنلام أمك..
تخاف تنحاش من البيت مرة ثانية,,, ياصالح لاتلومها هم بعد هي أمك وتخاف عليك..
صالح: ماجبت شي جديد سوق وأنت ساكت..
****
*******
**********
((في بيت أم عبدالرحمن))
فيصل يطالع الساعة وكانت الساعة 1,30 منتصف الليل..
فيصل:أقول يابوالشباب ماكنك عريس ماودك تقوم..
مشاري وهو كان متحمس يطالع في الفيلم وناسي الدنيا ومافيها لأنه ببساطة مدمن أفلام.. تنهد وتذكر همه رهف وأخذ نفس قوي وقال:
طيب وخير ياطير..
فيصل:عمي مشاري الساعة وحدة ونص قوم عند حرمتك وشمقعدك؟؟
مشاري: شوي إلما يخلص الفيلم وأقوم..
,,فيصل يعدل جلسته ويطالع بمشاري ويقول:
آآآآآآه... والله والله لو أنا أعرست لأقعد شهرين ماحد يشوفني ولا أبي أشوف أحد وانت قاعد ,,, والله والله لأقعد مخليها بحضني أربعة وعشرين ساعة ماأفكها ويا ويلها إن قامت...
,,,,ويمد رجوله ويحط إيدينه ورى رقبته ويقول:
آآآه ياعمي مشاري أمنية حياتي إني أتزوج,,,, ويكون لي شخص يشاركني بحياتي ويهتم فيني..بس كلما قلت لأمي تقولي توك بزر..
,,,,ويرجع فيصل يفز ويطالع بمشاري ويقول:
وأنت حضرتك متبطر عالنعمة مالك إلا ثلاث أيام متزوج وقاعد تشوف أفلام..
مشاري:الله لايبلينا مابلاك ويشفيك... بزر وتقول هالحكي,,عيب..عيب توك صغير يابابا..
فيصل يرفع حاجب وينزل جاجب..
فيصل: أنابزر هاه,,, اطلع برا اطلع برا..
مشاري:عيب ياولد استح أنا عمك..
فيصل: كيفي غرفتي وأنا حرأصلآخلاص أبي أنام...
مشاري: الشرهة موعليك الشرهة علي أنا,,, ياللاه نام... نومة بلا قومة..
ويطلع مشاري وهو حاس بضيقة الصدر ولا يدري وين يروح..ياربي وين أنام؟؟ أنام تحت فشلة وهذا أنا بغيت أسوي فيلم وأنام بغرفة فيصل طردني قبل ما أنام وأنا من جد من جد ما أبي أشوف بنت الناس هذيك ولا أبي يجمعني فيها مكان واحد..
كان مشاري قبل مايتزوج ينام في غرفة مستقلة وهالغرفة اللي يشوفها يعرف على طول إنها غرفة شاب كانت مليانة مجلات سيارات واستريو كبير وحمالات سيديات مليانة سيديات زيادة عالسيديات اللي في أدراج المكتب ودي فيديات وأشرطة بكل مكان وكمبيوتر مكتبي عالمكتب محتفظ فيه زيادة عاللاب توب حقه,,
لكنه بعد ماتزوج أمه شالت سريره ورتبت الغرفة وخلوها لأسماء بنت عبدالرحمن..
وحطوا لمشاري غرفة نوم جديدة فخمة جدآ في غرفة له وهو ورهف كبيرة جدآ داخلها حمام وغرفة تبديل مفتوحة على الغرفة نفسها..
يعني مافي غرفة جلوس تتبع لغرفة النوم ممكن ينام فيها مشاري دون ما أحد يدري..
,,استسلم مشاري لأنه تعب من التفكير وهو صدق نعسان ويبي ينام ودخل غرفته..
**
**
كانت جالسة على طرف السرير ولابسة قميص نوم ليموني قطعتين طويل مسترها كلها..
وكم مرة فكرت إنها تنام لأنها طفشت وتعبت من الانتظار بس كانت تقول عيب يا بنت استنيه..
,,,,دخل مشاري وهومبوز ويحك راسه ومن دون مايقولها ولا كلمة دخل غرفة التبديل وغير وعلى طول دخل تحت البطانية وعطاها ظهره,,
حست بإهانة شديدة وقهر:
إشهذا أنا قاعدة أستناه من الصبح ومتعبة نفسي وما أبي انام آخر شي يدخل وينام من دون مايقولي ولاكلمة..
,, تنهدت رهف وقامت طفت اللمبات ودخلت تحت البطانية ونامت..
مشاري كان يحس بكل شي هي قاعدة تسويه ,, لكن لما نامت جنبه تضايق كثير وقال فنفسه بكرة نشوف حل لهالوضع...
*****
*******
الجوال يدق الساعة 12 الظهر..
مشاري:......ألو..
تركي:ياخي كل هذا نوم إنزل تحت أبيك..
مشاري:ليه كم الساعة؟؟
تركي:الساعة 12 قوم ياللاه..
مشاري:....طيب..
,,,قام مشاري سيدة عالحمام من دون حتى مايلتفت لرهف ولا يشوف هي قايمة ولا لا وحتى لو التفت مارح يلقاها لأنها قامت قبله بنص ساعة وجلست مع عمتها بغرفة الجلوس,,
نزل مشاري عالديوانية على طول بعد ماصلى ولبس..
مشاري:السلام عليكم..
تركي:عليكم السلام
مشاري:وين أمي؟؟
تركي:داخل...,,ويرفع تركي يده وفيها تذاكر سفر ويلوح فيها لمشاري..
مشاري:وشهذا ياتركي؟؟
تركي:تذاكر سفر لك أنت وزوجتك رحلتكم اليوم على جدة الساعة 12 الليل..
مشاري: ليه ياتركي ليـــه أنا قلتلك سو كذا..
تركي: لاماقلتلي ولا أحد قالي بس هذي مفاجأة لك أنت وزوجتك وبعدين هذا رابع يوم لك من بعد ماتزوجت ,,,ماتبي تسافر شهر عسل كل هذا حب في الرياض..
مشاري:ياتركي الله يهديك أنا ناوي أسافر بس مو كذا ..
تركي: إشلون مو كذا؟؟
مشاري: يعني بتخطيط وتدبير مو فجأة كذا..
تركي: ماهيبمشكلة خلاص أنا قصيتلك أنت وزوجتك تذاكر السفر الصبح وحجزتلكم فيرست كلاس مع إن الدنيا زحمة على رحلات جدة لكن الحمدلله معارفي في الحجوزات ماخيبوا ظني وضبطوا الأمور..
وأول ماتوصل جدة رح تلاقي هناك أمجد أحد الموظفين في معرض السيارات حقنا هناك تلقاه ينتظرك وبيسلمك سيارة لك أحسن من إنك تتبهذل بالليموزينات تكون معكم طوال فترة وجودكم بجدة,,
وتراني حجزت لكم بفندق(راديسون ساس) حجز مفتوح ...
مشاري:ياتركي ماله داعي تعبت نفسك..
تركي:ماتعبت نفسي ولا شي روح داخل عند حرمتك وقولها تجهز شناطكم
عشان الساعة 11 أو 11,15 نحرك للمطار..
مشاري,,,,يتأفف ويحط يده على خده ويطالع بالتلفزيون وهوعاقد حواجبه وحاس نفسه متورط وانحط قدام الأمر الواقع...
تركي: مشاري افطرت..
تذكر مشاري انه ما أفطر: لا ما افطرت أبدخل أسلم على أمي وآكلي شي..
وقام بسرعه وهو معصب وطلع من الديوانية ودخل داخل..
تركي مستغرب من حال مشاري:
ياالله هالولد وشقصته في عريس بالدنيا يسوي حركاته؟؟
توه ماخلص هو وياها أسبوع وفي كل هالطفش وزعلان كل هالزعل..
بعدين اشلون ينزل من غرفته من غير مازوجته تزهبله فطوره...
::::
///////
كان داخل لغرفة الجلوس بكل عصبية ومو شايف أحد قدامه..
يجلس جنب أمه ويسلم على راسها:
سلام يمه..
أم عبدالرحمن: هلا بولدي..عليكم السلام..
,,كانت رهف جالسة من الجهة الثانية للطيفة ويوم شافت مشاري دخل عليهم..
لا أراديآ ابتسمت فرحة بقدومة وبشوفته وتوسعت عيونها وماقدرت تشيل نظراتها من عليه ...مع إنه ماناظرلها حتى نص نظرة ولا وجهلها أي كلمة..
مشاري يكلم محمد ولد عبدالرحمن اللي كان جالس يلعب بالقيم بوي عالأرض..
مشاري: حبيبي حمودي روح نادي أسيل..
محمد:أسيل لسه نايمة..
مشاري:طب روح ناد أمك..
...رهف هنا استغربت من انه مشاري يبي منى... وليه... ووشيبي فيها...
محمد:طيب...
ثواني ولا منى جاية..
منى كانت جاية من فوق لأنها كانت بغرفتها وكانت لافة عليها شال..
منى:نعم يا مشاري..
مشاري: صباح الخير..
منى:هلا والله صباح النور..
مشاري: منى بالله قولي لوحدة من الشغالات تجهزلي فطور مابعد فطرت وخليها تجيبه لي في صالة الطعام..
منى بعد صمت وهي مستغربة: .... ابشر,,
وراحت منى وتوجهت للمطبخ وهي مستغربة:
ياربي اشفي مشاري... ليش مايقول لزوجته ليش يناديني أنا؟؟
رهف هنا نزلت راسها وراحت بتفكيرها بعيد..
معقولة أنا جالسة قدامه بدل مايقولي أنا اجيبله فطوره ينادي منى من فوق عشان تقول للشغالة,, حتى مجرد كلام مايبي يكلمني...
أم عبدالرحمن:ها يامشاري شفت تركي ..
مشاري وهوكان سرحان: ها...ايه ايه شفته
أم عبدالرحمن: وها عسى عجبتك المفاجأة..؟؟
مشاري: إيه الله يعطيه العافية..
أم عبدالرحمن:وانتي يارهف وشرايك؟؟
رهف وهي مو فاهمة شي : أي شي منكم ياعمتي زين..
بس والله أنا ما أدري عن وشو تتكلمون..
لطيفة تلتفت على مشاري: ماقلت لرهف يا مشاري؟؟
,,,مشاري هنا حس نفسه تورط.. لكن أنقذه ذكاءة وتدارك الموضوع:
,,,,يمه الله يهديك بغيت أسويلها مفاجأة بس أنتي خربتيها..
ويقوم مشاري وهو يطالع أمه:
يمه عن إذنك أنا بروح أستنى فطوري بصالة الطعام,,, وأبي رهف معي..
أم عبدالرحمن: لاياولدي لاتستأذن خذ راحتك..
مشاري وهو ماشي وطالع من الغرفة يلتفت من دون مايطالع أحد:
رهف تعال معاي أبيك..
رهف على طول مشت ورى مشاري,,
جلس مشاري على طاولة الطعام وكان مدخل إيدينه الثنتين بشعره ويحك راسه..
ورهف كانت واقفة جنبه..
مشاري: وشفيك واقفة إجلسي..
رهف جلست وعينها عليه وهو مافكر حتى يطالعها..
شبك أصابعه وتكى على طاولة الطعام وحط إيدينه تحت دقنه وقعد يناظر قدامه..
مشاري: أخوي تركي حجزلنا على جدة اليوم ورحلتنا الساعة 12 يعني 11 مقفلة شناطك وزاهبة ومعطيتهم الشغالات عشان ينزلونهم تحت..
رهف مبسوطة إنها أخيرآ بتطلع من الرياض وتشوف جدة اللي بس كانت تشوفها بالتلفزيون... وبنفس الوقت مو عاجبها زعل مشاري وطريقة حكيه..
رهف: وانت تبيني أزهب شناطك؟؟
مشاري: أنا بسوي كل شي لي ,,لاتمسكين شي أبدآ..
حست رهف إن كل مال نفور مشاري منها يزداد.. ومولاقية أي تفسير لهالنفور,,
"""دخلت الشغالة جيسي وهي شايلة صينية الفطور وحطتها قدام مشاري..
وهي تطالع في مشاري ورهف بكل سعادة ومبتسمة إبتسامة عريضة وكعادة الشغالات الملقوفات
جيسي: باب ميساري مبروك..
مشاري وهو ماسك كاسة العصير بيده ويطالع قدامه ومايناظر فأحد: الله يبارك فيك..
جيسي:بابا ميساري ماساء الله هذي أروسه هيلو..
مشاري وهو يسحب الكرسي اللي على يساره:
أقول جيسي وشرايك تجلسين جنبي أزين؟؟
جيسي ضحكت وعلى طول راحت المطبخ..
التفت مشاري على رهف:
انتي للحين ماقمتي قومي جهزي اللي قلتلك..
وترى بوديك عند أهلك تتغدين عندهم وتودعينهم وبعد العصر أبجي آخذك تكملين ترتيب..
ويقول فنفسه(خلني أفتك منك شوي)
رهف قالت طيب وطلعت فوق على طول تزين اللي قالها مشاري..
::::
(في غرفة رهف ومشاري)
ورهف جالسة على طرف السرير وهي تحط الملابس والأغراض الضرورية بالشنط اللي بتاخذها معها,,,,, ولاشوي ويدق الباب..
رهف: مين؟؟
أسيل: أنا أسيل..
رهف: تعالي أسول حبيبتي ادخلي..
أسيل: صباح الخييير
رهف:وانتي الصادقة مساء الخييير
أسيل:هههههههههه رهف تعرفين العطلة والسهر,,
رهف تبعد ملابسها من جنبها: تعال حبيبتي اقعدي..
أسيل: وشقاعدة تزينين؟؟
رهف: أجهز شناطي بنسافر جدة اليوم رحلتنا 12الفجر
أسيل:رهف بالله انهبلتي إنتي ومشاري تركتوا دول العالم كلها اللي يقدر عمي يلفها لف وتعيشون فيها أحسن عيشة.. وتقنعينة إنكم تقضون شهر العسل بجدة..
ليه قلت الأماكن..
,,,رهف انصدمت من أسيل وقالت فنفسها (تقنعنيه؟؟؟)
ياربي أنا ماجبتله لا سيرة جدة ولا غيرها,,,
رهف تبلع ريقها: طب وشفيها جدة..مي حلوة
أسيل: مافيها شي بس حر ورطوبة..بس تصدقين الظاهر يارهف إنك تحبينها مرة ومو قادرة تستغنين عنها؟؟
رهف:ههههههههه إي صح كل صيفية فيها
أسيل مستغربة: وشفيك تضحكين..
رهف: يا أسيل أنا ماقد طبيت جدة ولا غيرها..
أسيل طارت عيونها: معقول ياعمتي ماقد سافرتي؟؟
رهف:لاحبيتي ماقد سافرت وخليت الرياض أبدآ..
أسيل:يعني اليوم أول مرة بتركبين الطيارة؟؟
رهف:إي,,أول مرة بركبها وأول مرة بطلع برى الرياض..
أسيل:ياحبيلك يارهف وحدة غيرك بتاخذ مشاري ولا واحد من عايلتنا بتقعد تتشرط إنها تلف العالم...وانتي ياقلبي بس تبين جدة..
رهف وهي مبتسمة: يا أسيل أنا أصلآ حاطة خطة,, أول شي بخليه يوديني جدة بعدين مابخلي ديرة على الأرض مابسافرلها..
أسيل: ههههههههههههه
رهف:هههههههههههههههه
****
******
**********
(في بيت أبوصالح)
أبرار: اطلعــــــــــي براااا..
أفنان: يوووه ,,أمي تقول إقعدي مع خواتك؟
أثير: لاااا,,, وانتي ماعندك شخصية ...خلاص انزلي قولي مابي أجلس معهم..
أفنان:لا مانيبطالعه كل شوي طالعة نازلة.....وتنسدح أفنان عالسرير...
أبرار: أفنــــــــانوه يا الجمرة الخبيثة إطلعي برا أحسلك..
أفنان: مارح اطلع... انا مو فاضية انزل تحت بعدين ترجع تقولي أمي إقعدي مع خواتك...لا خلاص بقعد هنا..
****الجرس يدق,..
وينزل صالح يفتح الباب واول مافتح الباب...
صالح:هلااااا واللــــه
مشاري بدون نفس: هلا فيك..
ويمسكه صالح ويسلم عليه بحرارة ,,,, والتفت صالح يطالع خلف مشاري ولا لسه رهف مابعد دخلت..
على طول سحبها صالح مع يدها لجوا البيت وقفل باب الشارع..
صالح:تعالي,,,تعالي..
وقبل ماتفك النقاب حضنها صالح بيدينه الثنتين وكانت رهف مبسوطة بأخوها مرة وخانقتها العبرة وتضحك..
رهف وهي تضحك:صالح خنقتني خلني أفك النقاب..
صالح فك إيدينه من حولينها... وعلى طول سحب نقابها وفكه ورجع لمها بكل حرارة وحب..وهي تضحك ومبسوطة ودموعها.. تنزل على جنبات خدودها..
وكانت مثل الحمامة البيضا الرقيقة بيدين أخوها اللي كان منحني عليها وغامرها بحنانه..
مشاري لما شاف هالحضنة القوية استغرب وحس بشعور ثاني غريب أول مرة يحس فيه مايدري اشهالشعور,,, وقال في نفسها,,خير لايكوني أغار؟؟؟
صالح وهو يمسح خدود رهف من الدموع...:
مشاري وشفيك واقف ومتنح إدخل حياك الله,,
دخل مشاري الملحق ولقى أبو رهف قاعد يطالع هالتلفزيون وفاتح على السي إن بي سي العربية ويتابع هالأسهم..
بكل برود وهو ماله نفس أبدآ ويالله يالله قام:هلا بمشاري...
***
كانت منيرة واقفة بالمطبخ تفرغ الغدى بصحون..
رهف: سلام عليكم يمه..
منيرة التفتت وهي ماسكة المغرفة بيدها,,, وبدون نفس..
منيرة:هلا,,,هلا
راحتلها رهف وتبوسها على إيدها وراسها بكل حنية..
منيرة:كويس جيتي أنتي ورجلك الغدى جاهز..
رهف:ماظنيت يمه إن مشاري بيتغدى معنا عنده مشاوير وبيروح يخلصهم..
منيرة وهي منشغلة تضبط الصحون: إيه المهم رهف الله لا يهينك روحي فوق ونادي خواتك..
رهف: طيب يمه..
طلعت رهف فوق بعد مافصخت عباتها ولقت باب غرفة أبرار وأثير مفتوح..
رهف: الســـــلام عليكم..ماودكم تنزلون تتغدون؟؟
أثير: رهف أهليــــــــن
وطارت أثير لرهف وقامت تسلم عليها وابرار يالله يالله قامت من عالسرير بكل نفسية خايسة وسلمت على رهف هي وأثير..
أثير: رهف غريبة جاية الحين..
رهف: إي قلت أجي اسلم عليكم قبل ما أسافر..
هنا أبرار انقهرت وحست إنها بتنفجر وتركت الغرفة ونزلت عند أمها تحت..
منيرة وهي تحط الصحن عالغدى:
وين خواتك مانزلوا.؟؟
أبرار وهي مطنقرة: نازلات الحين..
منيرة: أجل روحي نادي ابوك واخوك قوليلهم الغدى جهز..
:::
نزلوا البنات وقعدوا عالأكل وجوا سلطان وصالح..
منيرة:وين رجل بنتك ورى مامسكته عالغدى..
سلطان وهومد يده وبدى ياكل:يقول مشغول وبيروح يخلص أشغاله لأنه اليوم بيسافر هو ورهف..
صالح: إلا صح رهف وين بتسافرون؟؟
رهف: جدة
أبرار تشرق بالأكل وتجلس تضحك وتضحك وأثير من ضحك أبرار ضحكت هي وأفنان..
أبرار: حمدالله زوجك مليندير ويسفرك شهر العسل جدة؟؟
رهف طارت عيونها وحست انه ابرار تتريق عليها وشمتانة..
رهف: والله هذي رغبته وهو حر..
أبرار: حتى العرسان الفقرانين المنتفين يسافرون ماليزيا ولبنان ودبي ومصر..
وهو اللي يلعب بالفلوس لعب مالقى غير جدة..
صالح: وانتي اشحارق رزك جدة تايلاند استراليا كيفهم هم حرين..
منيرة كانت نفس بناتها شمتانة ومبتسمة ابتسامة عالجنب..
منيرة: خلاص,,خلاص لاخلصتوا غدى وشبعتوا قوموا وسولفوا مع أختكم زي ماتبون الحين وقت غدى.. تغدوا وانتم ساكتين..
رهف حست أنه مافي مبرر إنه ابرار واثير يضحكون هالضحك,,
جدة ولا غيرها كله سوا..
___
______
كانت الساعة سبع ونص المغرب ورهف متوترة وحاسة بالفشلة لأنها قالت لهلها إنه بعد العصر بيجي ياخذها وإلى الآن ماجى الله يستر لايكون صارله شي ولافيه شي
ياربي حتى رقم جواله ما أعرفه..
منيرة بأسلوب لعانة ويعننها تحب رهف: رهف حبيبتي اطلعي ريحي شوي فوق يمكنه بيتأخر ولا أجل سفركم وبيجي ياخذك بكرة..
رهف بكل براءة:ها...لا ما أتوقع بس انشالله يدق ويطمني..
***
*****
(الجزء السادس)
طارق:حشى,,, حشى منت بمسافر شهر عسل رايح الجيش؟؟
مشاري شيل هالتكشيرة من وجهك..
مشاري وهو سرحان ويحوس بجواله:من قالك إني مكشر أو زعلان بالعكس...
طارق: لاوالله من شاف وجهك يحس إن ميت لك ميت..
مشاري: فكنا من لقافتك وبثارتك... إلا شخبار عزام؟؟؟
طارق: ماعليه يزقح... آخر مرة شفته يوم زواجك..
لا وتراه زعلان منك..
مشاري: يزعل الين يوم الدين...
طارق: هههههه حرام عليك يا مشاري تراه ضعيف..
مشاري: ضعيف ماقلنا لا,,, بس داج وموبصاحي أبد... أنا ماقلتلك وشسوى قبل يوم زواجي بيومين... الا صح وشوله أقولك وأنت كنت معي وشفت بعينك وشسوى خير وين إحنا فيه من متى نسوي هالحركات؟؟..
طارق:هههههههه ياخي فلااا موبصاحي..
مشاري: إلا مجنون..
طارق: ياخي مسيكين الله يهديه ويتوب عليه قبل لا يفوت الفوت..بس أنت كان تفهمت الموضوع ولا عصبت عليه بهذيك الطريقة شفت الضعيف يوم زواجك حضر وقعد معك وسولف معك ولا كأنك سويت شي...
مشاري:نعم؟؟؟ تبيني ما أعصب عليه.. طارق بالله عليك أنت راضي عالشي اللي سواه عزام..مجمع لي أربع بنات صايعات مادري من وين جابهم في فلته,, ويقولي كل واحد يختار وحدة ويوسع صدره,,,, أنا وياك طارت عيونا أقوله ياعزام استح على وجهك ياعزام وشهالحركات...يقولي يامشاري ترى ماجبتهم إلا عشانك هذي حفلة توديع للعزوبية لك ... اليوم وسع صدرك لأنه بعد يومين خلاص بتبدى ضيقة الخلق..
بالله ياطارق كم مرة أنا وياك فهمناه أنه إحنا ما نحب هالحركات لكنه يستعبط وماجاه جزاه وأقل من جزاه..
طارق:يامشاري عزام ماينلام مسكين من يوم وعى عالدنيا وهو مشرد ومشتت ولا حس بالأمان والراحة ولا لقى تربية صح,, مايلقى إلا هالألوف اللي تنكب برصيدة شهريآ,,, أمه عايشة مع زوجها بأمريكا ولا تدري عنه وكل ماقالها أنه يبي يسافرلها ترسله فلوس وتقوله أنا بسافر للمؤتمر الفلاني بالدولة الفلانية مع زوجي,,
وأبوه مع زوجته وعياله بالشرقية لاهي بمصانعة ومحلاته وعياله وكل ما سافرله عزام تنكد عليه مرة أبوه وتهبل فيه وأخوانه مسفلين فيه ومحقرينه عشان كذا الولد
فضل يعيش لحاله ويكونله عالم خاص بعيد عن هالصجة كلها ..
مشاري:طارق أنا عارف هالحكي كله ومقدر ضروفه.. بس هم إحنا ماقصرنا معاه ياكثر ماوقفنا جنبه ونصحناه وقلنا هذا طريق لا مشى الواحد فيه ينبلي ولايقدر يطلع منه ولاهوطالع إلا بفقر ولا مرض ولا فظيحة لكنه مايفهم,,,
وبعدين ياطارق إنت آخر واحد يتكلم عن الظروف .. ظروف عزام لاتقارن بظروفك أبدآ..
أبوك ميت وأمك مريضة بالقلب وأختك اللي أكبر منك مقعدة ومتخلفة عقليآ وأنت اللي تشيلها وتحطها ,وعندك خواتك الثنتين اللي بالمتوسط إنت اللي تصرف عليهم وتراعيهم وتربيهم وحالتك حالة ...
ومع كل هذا منت بقاعد تسوي ربع اللي يسويه عزام..
طارق: يامشاري محنا ملائكة منزلين كل الناس يخطئون.
مشاري: يخطئون بس مو يستمرون بالخطأ ويجرون خلق الله معهم أوكي مشيناها معاكس بالتليفون مشيناها استهبال في الأسواق بس ماتوصل لجريمة تهز عرش الرحمن ياخي ذنوبنا تكفينا....
طارق:الله يهديه,,, الله يهديه يا مشاري..
,,,مشاري يقوم: اللهم آمين يالله طارق أنا بروح الحين ,,
طارق: الله يحفظك يالغالي انتبه لنفسك ولزوجتك ,,, ويقوم طارق ويحضن مشاري ويودعه.. ويحمله مشاري السلام لصديقهم عزام لأن مهما صار هذا صديقهم ولازم يوقفون معه الين يبطل هالحركات ويتوب لله....
***
*****
وصل بسيارته عند باب البيت ... لكنه حس نفسه تورط..
,,,ياربي ماودي أنزل وأدق جرس البيت أخاف يطلعلي أخوها البثر ولاأبوها وأنا مالي خلق أحد ... وحتى رقم جوالها ما أخذته منها..
ياللاه مافي حل إلا إني أدق الجرس واللي يسير يسير..
نزل مشاري ودق الباب..
أفنان: مين؟؟
مشاري:أنا مشاري بالله خلي رهف تنزل..
أفنان: طيب..
....
أبرار: من اللي دق الجرس؟؟
أفنان:هذا مشاري زوج رهف يقول خليها تطلع..
أبرار: خلاص للحين قاعدة انزلي تحت وقوليلها تذلف..
... أول مانزلت أفنان لتحت عشان تنادي رهف,, على طول أبرار نطت للشباك وفتحته وقامت تطالع مشاري..
أبرار: ياااويلي يجنن..
أثير تتجه لأبرار: منهو؟؟
أبرار:مشاري يا أثير تعالي بسرعة شوفي واقف برا في الشارع يجنن..
أثير: أشووف [وتشهق أثير] يجـــــــــــــــنن
أبرار: لا وشوفي سيارته بعد.. شي يخقق
أثير: الله يابختك يارهف كامل والكامل الله..
أبرار: ياالله يالقهر بالله واحد مثل هذا تاخذه عجوز ابليس..
أثير: حرام عليك يا أبرار حتى رهف ماعليها مزيونة..
ابرار: إي مرة اللي مثلها تروح دار المسنين أزين..
... ولا صوت منيرة من تحت : أبراااار,, أثيــــــــر , تعالوا سلموا على رهف بتروح..
أبرار:روحي انزلي سلمي عليها وأنا بقعد أطالع هالزين وقوليلها أبرار تتروش,,
أثير: ياشيخة انزلي وشبتقعدين تسوين هنا..؟؟
ابرار: بقعد أطالع هالملاك واتحسر على حض أمن جابتني..
أثير: هههههه الله يرجك يا ابرار الرجال بيجيه عين هو ورهف والسبة أنتي..
أبرار: أقول اطلعي برا..
.....,,,
ودعت رهف أهلها وكان الوداع جدآ بارد لأنه الصراحة ماحد جاب خبرها سافرت ولا قعدت هذا موشي مهم بالنسبة لهم إلا صالح اللي كان يتمنى لأخنه كل خير..
,,, طلعت رهف ولقت مشاري يستناها بالسيارة برا..وركبت اسيارة..
رهف:السلام عليكم..
مشاري:.....سلاام
رهف:طولت عليك وانت برا؟؟
مشاري:........لاء
رهف:مشاري الله يهديك خوفتني عليك إنت قايلي إنك بتجي العصر تاخذني وتأخرت مرة علي ..
هنا مشاري مارد على رهف وعلى طول قالها: ,,, وين جوالك؟؟
رهف حست بالتصريفة: هنا معي..
مشاري:سجلي رقم جوالي ودقي دقة وقفلي عشان اعرف رقمك..
رهف:... طيب
مشاري******0555) دقي دقة
رهف بعد مانقلها الرقم دقت دقة وقفلت ..
::::
وصلوا رهف ومشاري البيت وقالها في السيارة قبل ماتنزل:
زي ماقلتلك الساعة 11 شناطك جاهزة..
رهف: طيب..
نزلت رهف ودخل مشاري الديوانية وسولف مع أهله شوي وبعدين طلع غرفته عشان يرتب ملابسه بالشنطة... وكان طول الوقت يتحاشى النظر لرهف وماقالها ولا كلمة ولماعرضت عليه إنها تساعدها قالها بكل رسمية:
لآء شكرآ..
بعد ماجا وقت طلوعهم للمطار سلموا رهف ومشاري على أهل مشاري وتحركو بالسيارة للمطار واللي وصلهم للمطار السواق ..
:::
بعد قص البوردنق وشحن الشنط.. مشاري خلا رهف تجلس بصالة الانتظار جنب مجموعة حريم وهو راح جلس بعيد عنها,, على العكس من كل العرسان المتواجدين كان كل واحد جنب عروسته وحاط راسه براسها وكل واحد غرقان بالسوالف والمزح ..
إلا رهف اللي كانت تحس بالوحدة وجالسه لحالها وعيونها ما انشالت عن مشاري اللي كان جالس بعيد عنها ومقابلها ولا فكر إنه ينظرلها نظرة وحدة..
الساعة11,55دقيقة
شوي ولا المطار يعلن عن تأخر رحلة جدة من الساعة 12 الى الساعة 2,15..
هنا مشاري انصدم وحامت كبده وقال في نفسه:
يا الله على كثر ماسافرت وجيت سبحان الله ماقد صادف وتأخرت الرحلة الا هالرحلة لاوبعد مو أي تأخير..ساعتين وزيادة..صدق المنحوس منحوس,,
والبلشة إني بموت من النوم.. والصداع يالله أقوم آخذلي كوب قهوة أعدل فيها المزاج ,,,,,.. وانتبه مشاري للاب توب اللي بيده..,,,يووه يالفشلة يعني اشلون اقوم واشتري وهو بيدي مافي حل إلا أروح واعطيه رهف بدل ماهي قاعدة زي قلتها..
رهف كانت قاعدة وطفشانة وألمت الجلسة ظهرها بشكل كبير ولما سمعت خبرتأخر الرحلة تأزمت نفسيتها زيادة.. وخاصة إن كل رجل كان بعيد عن عايلته قام عند أهله وقام يسولف معهم ويصبرهم ويطمن نفسياتهم بعد خبر تأخر الرحلة إلا مشاري..
شوي ولا رهف شافت مشاري متجه لها وارتسمت على وجهها ابتسامة وقالت:
ياحرام والله إني ظالمته,,
مشاري لما قرب منها: خذي اللاب توب خليه عندك بروح أجيب لي كوفي تبين؟؟
رهف بخيبة أمل: لآء شكرآ..
راح مشاري على طول وشراله كوفي ورجع جلس بمكانه وقعديشرب الكوفي وهو في أشد حالات الطفش والملل طلع جواله عشان يقول لأهله إن الرحلة تأخرت ويخليهم ينامون وإذا وصلوا بيرسلهم مسج ويطمنهم..
توه ينتبه مشاري للميسد كول اللي بجواله من رهف لأنه طول الوقت مافتح جواله ولا كلم أحد..
لما فتح مشاري رقم رهف قال:
لا وبعد من زين الرقم ...لا وسوى بعد.. بطلعلها شريحة ورقم زي الناس وفواتيرها تتسدد زيها زي أي فاتورة بالبيت بدل هالسوا فاظي أشحنلها كل شوي..
::::
,,,,الساعة 3,50 الفجر
بعد ما انفجر مشاري من الانتظار وملت رهف من الجلوس,,
اعلنوا المطار للمسافرين لرحلة جدة إنه يتوجهوا للبوابة... كل الناس قاموا بعد انتظار طويل ,,
وعلى طول مشاري فز وقام وأشر لرهف بكل عصبية إنها تقوم..
هنا رهف خافت من نظرات مشاري وفزت على طول لكنها من التعب وشدة احتياجها النوم نست تجيب اللاب توب وخلته عالكرسي اللي جنبها,, وطارت لمشاري..
مشاري هنا لاحظ نسيارن رهف للاب توب ولا إراديآ لما وقفت جنبه وبكل عصبية قال:
الحين انتي خبلة ولا تستهبلين جاية تتمخطرين وين اللاب توب؟؟
رهف:ها...
وتذكرت رهف إن مشاري اعطاها اللاب توب بس هي نسته..
رهف وهي خايفة وقلبها يدق بسرعة:طيب طيب بجيبه الحين..
مشاري بكل عصبية:انثبري أنا بجيبه,,
::
جلست رهف على مقعد الطيارة ودموعها كانت تنزل لاإراديآ على خدودها لأنها تهزأت تهزيئ محترم ولايمكن عروسه يسيرلها هالشي...
من جهة مشاري اللي ماكذب خبرعلى طول حط مخدة تحت راسه ونام...
وترك رهف مجروحة وحاسة باحساس كبير بعدم الأمان والاستقرار..
::::
::::::
وصلوا مشاري ورهف عالساعة 6 الصبح مطارجدة وبالفعل لقى الموظف أمجد يستناه ومعاه مفاتيح السيارة .. أخذ مشاري السيارة وركب الشنط وعلى فندق
(راديسون ساس) ولما طلعوا جناحهم بدون أي شعور ولاتفكير فصخ مشاري ثوبه وشماغه وظل بسرواله السنة وفنيلته ورمى نفسه على الكنبه اللي قدام التلفزيون من دون مايلبس بجامته ولا ياخذله شور ولا يزين أي شي ولايقول أي كلمة لرهف وراح في سابع نومة..
أما رهف كانت تحس راسها بينفجر من الصداع وألم فظيع بعيونها من كثر الصياح,,,غيرت ملابسها ولبست بجامة وتمددت عالسرير وراحت بسابع نومة...
:::::::::::::::::::::::::::::::::::::::::::::::::: :::::::::::::::::::::::::::::::::::::::::::
:::::::::::::::::::::::::::::::::::::::::::
(في بيت أبوصالح)
ابرار:لااا من جدك انتي,,,,لا ماقلت لأهلي ولا راح أقولهم..
الجوهرة:الظاهر إنك ماذاكرتي زين ..
ابرار: شكلي بعيد السنة لأن الترم الأول رسبت بثلاث وهم الترم الثاني بثلاث..
أقول شكلي بفصل واريح راسي ,,, ما استفدت شي من هالدراسة..
الجوهرة: كيفك إنتي حرة..
ابرار: الحين المشكلة اشلون بقول لأبوي وأمي..
الجوهرة: الله يعينك....
:::::::
::::::::::
(في فندق راديسون ساس)
.... كان راسها تحسه بينفجر لما شافت الساعة لقتها 2,30 الظهر..
رهف:ياربي يا الصداع الظاهر إني طولت بالنوم..
قامت رهف وفتحت شنطة الملابس وطلعتلها منشفة وروب الحمام عشان تاخذلها شور لكن مشاري كان بالحمام..
استنته لما يطلع,, طلع مشاري وهو لاف منشفته عليه وشعره يقطرمن الموية..
على طول رهف لما شافته نزلت راسها واستحت وتلون وجهها مية لون ولون..
لأنها أول مرة بحياتها تشوف هالمنظر..
لاحظها مشاري ورفع حاجبه وقال: وشفيها ذي..
وطلع الصالة على طول من دون مايقولها ولا كلمة وهو على حالتة اللي طلع من الحمام فيها..
دخلت رهف الحمام وخذلتها شور وطلعت ونشفت شعرها ولبست تنورة ميدي ربيعية موردة بوردي واخضرفاتح وليموني ولبست بودي ليموني ودعجت عيونها وحطت قلوزوتعطرت بعطر كالفن كلاين وكان شكلها بناتي جدآ وناعم جدآ جدآ...
طلعت لمشاري اللي كان جالس يطالع بالتلفزيون وحاط قدامه الأكل ومتخدد..
رهف انبسطت إنه ما أكل واستناها وكانت بتتشقق من الفرحة انه استناها..
جت رهف وجلست جنبه:
السلام عليكم..
مشاري:...سلام
رهف:كيفك مشاري اليوم
مشاري: .....طيب
رهف:شكل الرحلة تعبتك زي ماتعبتني..
مشاري:........
رهف بلعت ريقها: اشهذا... الغدا؟؟ تصدق مرة جوعانة..
رهف تستنى من مشاري ردود.. لكن مالقت ‘إلا الصمت
رهف:طيب اشرايك نسمي بالرحمن وناكل..
مشاري: حد ماسكك كولي,,
رهف: وانت؟
مشاري: معليش سبقتك كنت جوعان .. كولي انتي..
رهف انصدمت وابتأست وزال فرحها بغمضة عين.. وبالفعل لما فتحت الأطباق لقته ماكل منها وشارب مشروبه,,, وجالس يناظر بالتلفزيون..
حست رهف بالإهانة وقسوة الصدود... يعني اشلون ابقعد آكل جنبه زي الشحاته وهو يناظر..
رهف قامت: لا الحمدالله .. مابي آكل شي.."ورجعت الغرفة مرة ثانية..
مشاري عارف إنها زعلت لما قامت ولا أكلت شي,,, لأنها اعترفت بلسانها إنها جوعانة..
مشاري يقول بنفسه:ياربي شالسواة معقول... ابقعد شهر مقابلها..
ومنحبس .. لاوبعد من زين الجو هنا بجدة خنقه وحر ورطوبة..
يا اللــــــــــه ياضيقة الصدرليتني مزين جوازها وسفرتها برا معي وأنا غيرت جو..
لكني غبي ومتسرع دايمآ آخذ القرار الخطأ دايمآ..
وهم هي بعد إزعاج.... ماتبي تاكل إلا وأنا معها...
,,,,,,,
,,,,,,,,,,
الساعة 12 الليل..
رهف وهي جالسة عالكنبة اللي مقابلة السرير وفي يدها جريدة قرتها ألف مرة ومرة.
رهف:ياربي مو معقول .. مومعقول ينزل يصلي ويرجع يطالع في هالأفلام..
حتى لما جت حزة العشى نزل تعشى تحت وبعدين جابلي العشا هنا بالغرفة يعني لاإشوفك إقعدي تعشي هنا,,
ياربي اشسالفته هالرجال... تعامله معاي وطريقته بالحكي معاي تختلف 180 درجة عن طريقته لما يحكي مع امه وأهله...
فكرت رهف ورجعت فكرت وقررت قرار وتوكلت على الله إنها تنفذه... يمكن يتحسن الوضع...
طلعت رهف من غرفة النوم ولا لقت مشاري يكلم أمه بالتليفون..
مشاري:يايمه تطمني ,,,,انشالله,,انشالله..
رفع راسه مشاري وطالع فرهف.... إي إي هذي هي جنبي..
رهف تعالي كلمي أمي تبيك..
رهف: هلا..
الحمدلله,,,بخير الحمدلله...
لاماعليه طيب... لاياعمتي الحمد الله مبسوطين
أي والله مشاري مايقصر..تسلمين ياعمه..
تسلمينلي..الله يخليك لنا انشالله..
إي يعني تعبتنا الرحلة شوي...
لابس الحمدلله الحين طيبين...ابشري في عيوني..
,,,,,كان مشاري يناظر التلفزيون ومسوي نفسه سافه رهف ومو معطيها وجه بس الحقيقة إنه كان قاط إذنه عند رهف ولافت انتباهه طريقتها بالحكي مع أمه واشلون تبين إنها مبسوطة مع إنها شكلها بتموت من الطفش..
رهف: سلمي على الكل ياعمه..
تصبحين على خير...
رهف تمد يدها لمشاري اللي كان ملقيها ظهره: مشاري خذ جوالك..
من غير مايلتفت مشاري مد يده وأخذ الجوال من رهف..
رهف :اشقاعد تتفرج فيه؟؟
مشاري:...فيلم
رهف: حلو هالفيلم؟؟
مشاري:.. يعني..
رهف سكتت وجلست تفكر وبتردد كبير قالت:
مشاري أبي أقولك شي...ممكن؟؟
مشاري من دون مايلتفت: ...نعم
رهف: مشاري أنت مغصوب على الزواج مني؟؟
..مشاري يعدل جلسته ويطالع فيها بكل حقد وعصبية:
نعم وشقلتي؟؟
رهف خافت وندمت إنها تكلمت لأن ملامح مشاري سارت تخوف وتعقدت حواجبه وفتح عيونه عالأخر...
رهف تقوم بخوف وجايه تبي تطلع: لا خلاص ولاشي تصبح على خير..
مشاري يفز من مكانه ويمسكها مع يدها بأقوى ماعنده ويطالع فيها:
لأ يا رهف قلتي.. بس ماسمعتك عيدي مرة ثانية وشقلتي؟؟
رهف بخوف:ها ولاشي ..
مشاري:قولي اللي قلتيه احسلك
رهف:مشاري يرحم والديك خلاص أنا آسفة .... خلاص خليني أروح أنام..
مشاري يسحب رهف ويجلسها عالكنبة ويقول:
إقعدي هنا ولاتتحركين سمعتي,,,
شوفي رهف سؤالك هذا أنا بجاوبك عليه جواب يريحك..
شوفي يارهف واسمعيني كويس أنا... ماني ببنية أهلها يمسكونها ويزوجونها غصبآ عنها وهي ساكته ودموعها على خدودها..
ولا ني بولد صايع ضايع أهله يبون يربونه ويعقلونه يزوجونه..
أنا يارهف رجال أخذتك بمحض إرادتي محد غصبني إني أتزوجك..
وإذا أهلي يبون يغصبوني على شي مايغصبوني عالزواج..
وإذا أنتي تعرفين حركات هالتخلف عند عايلات ثانية تراها هالحركات لايمكن ومو مكن تسير في عايلتنا..
سمعتي الحكي يارهف وفهمتي ولا أعيد..
قسمآبالله لو أسمعك تحكين هالحكي مرة ثانية تلقين نفسك ببيت أهلك..
سمعتـــــــــــــــــي؟؟
,,ويحط مشاري رجل على رجل وهو متوتر جدآ وعيونه ينط منها الشرار وهي مانزلت عن رهف...
حست رهف بتأنيب الضميرلأنها نكدت عليه وعصبته مع أنها ماكانت مصدقة أنه تزوجها برضاه وبإرادته لأن حركاته أبدآ مو حركات واحد متزوج برضاه..
رهف ووجهها أحمر:مشاري أرجوك افهمني..
أنا ما أقصد بس من يوم ماتزوجتك وأنت ماتكلمني ولا تقعد معي ومخليني لحالي ..
مع إني أبي أجلس معك أبي أسولف معك أبي أحس إني متزوجة بس إنت تصدني بشكل قوي يخليني أفكر بهالشي..
مشاري يتردد وبعد صمت ثواني بسيطة:
بس هذا مايخليك تقولين أبدآ هالحكي.. أنا مو بنية أهلي يغصبوني..
وبعدين أنا ماطردتك إنك تجلسين معي تبين تجلسين تعالي حياك الله ..
رهف: أنا ما أبي أجلس وبس أنا أبيك تحاكيني,,
مشاري:.... أنا كذا طبيعتي هادي.... ماحب الهذرة الواجدة..
رهف تنزل دموعها غصبن عنها وتمسحهم بسرعة:
عالعموم أنا آسفة... تصبح على خير..
مشاري بعد ماطلعت رهف

الله يعطيك العافيه اخوي الرمنسي وبنتظار ال تتمه

والى مزيد من التميز يا بطل

تقبل مروري